कोशी प्रदेशले नीति तथा कार्यक्रम जेष्ठ ५ गते प्रस्तुत गर्ने

विराटनगर– कोशी प्रदेश सरकारले आर्थिक वर्ष २०८२/८३ को नीति तथा कार्यक्रम जेष्ठ ५ गते प्रदेश सभामा प्रस्तुत गर्ने भएको छ ।

कोशी प्रदेश सरकारको आइतबार बसेको मन्त्रिपरिषदको बैठकले जेष्ठ ५ गते नीति तथा कार्यक्रम प्रदेश सभामा पेश गर्ने निर्णय गरेको हो । कोशी प्रदेश सरकारका प्रवक्ता तथा आन्तरिक मामला तथा कानुनमन्त्री रेवती रमण भण्डारीले प्रदेश सभामा सरकारको नीति तथा कार्यक्रम प्रस्तुत गर्नका लागि प्रदेश प्रमुख परशुराम खापुङलाई अनुरोध गर्ने निर्णय गरिएको जानकारी दिए ।

मन्त्रिपरिषदको बैठकले नीति तथा कार्यक्रम पास गरेको र प्रदेश सभामा प्रस्तुत गर्नका लागि आवश्यक व्यवस्था मिलाइदिन प्रदेश सभा सचिवालयलाई पनि आग्रह गरिएको मन्त्री भण्डारीले जानकारी दिए ।