गृहमन्त्रीको राजीनामा मागेर सदन अवरोध गर्नु अलोकतान्त्रिक : एमाले

काठमाडौँ – प्रधानमन्त्री एवं नेकपा (एमाले) का अध्यक्ष केपी शर्मा ओलीलें गृहमन्त्रीको राजीनामा मागेर सदन अवरोध गर्नु लोकतन्त्र विपरीत रहेको बताएका छन् ।

सोमबार संसद भवन नयाँ बानेश्वरमा बसेको एमाले संसदीय दलको बैठकलाई सम्बोधन गर्दै प्रधानमन्त्री ओलीले अनावश्यक रुपमा गृहमन्त्रीको राजीनामा माग गरेर विपक्षीले सदन अवरोध गर्नु लोकतन्त्र विपरीत रहेको बताएका हुन् । प्रधानमन्त्री ओलीले मङ्गलबारदेखि संसदका नियमित गतिविधि सञ्चालन हुने दाबी गरे ।

संसदको गतिरोध अन्त्य गर्ने विषयमा आफुले प्रमुख प्रतिपक्षी दलका नेता प्रचण्डसंग वार्ता र सम्वाद गर्न खोजेपनि जानीजानी सम्पर्कमा नआएको जिकिर गरे । गृहमन्त्रीमाथि कुनै उजुरी वा छानबिन नचलेको अवस्थामा राजीनामा दिनुपर्ने कुनै कारण नभएको उनले बताए ।

उहाले सडकमा कुनै समूहले केही माग लिएर बस्दा पनि कुँदेर गएर समर्थन गर्ने र सदन पनि अवरोध गर्ने कामले प्रतिगमनलाई सहयोग पुग्ने उल्लेख गरे । प्रधानमन्त्री ओलीले अर्थतन्त्र ओरालो लागेको तथा अराजकता र असन्तुष्टवादीहरुले विरोध गरिरहेका बेला बेग्लै चुनौतीको अवस्थामा बजेट आएको उल्लेख गर्दै उनले राजतन्त्र आजको बहसको विषय नै नभएको बताए ।

उनले आजको समाजमा जन्मिँदै राजा हुने वंश परम्परा र दास मानसिकताको वकालत गर्नु मुर्खता भएको तर्क गरे । कतिपय पक्षमा सत्ता छोड्नुपरेकाले वैचैनी र कुण्ठा प्रकट भएको टिप्पणी गर्दै उनले सरकारको राम्रो काम नदेख्ने र असफलता गराउने खोज्ने ‘घण्टाकर्ण’ प्रवृत्ति देखिएको बताए ।

उनले खास परिस्थितिबाट देश अगाडि बढिरहेको गम्भीर मोडमा सरकारको बजेट प्रस्तुत भएकाले यसका पक्षमा तर्कपूर्णरुपमा आफ्ना कुरा राख्न सांसदहरुलाई निर्देशन दिए । साथै उनले संसदीय गतिविधिलाई महत्व दिन मन्त्रीहरुलाई समेत निर्देशन दिए ।