नीति तथा कार्यक्रम बनाउँदा विज्ञको सुझावलाई प्राथमिकता : उद्योगमन्त्री सिन्हा

काठमाडौं– उद्योग, वाणिज्य तथा आपूर्तिमन्त्री अनिलकुमार सिन्हाले वर्तमान सरकारले नीति तथा कार्यक्रम अघि बढाउँदा विज्ञहरूको सुझावलाई प्राथमिकतामा राखेको बताए ।

नेपाल आर्थिक पत्रकार समाज (सेजन)ले शुक्रबार काठमाडौंमा आयोजना गरेको कार्यक्रममा मन्त्री सिन्हाले योजना, प्राथमिकता र नतिजा विश्लेषणबिनै सार्वजनिक खर्च गर्ने प्रवृत्तिका कारण जनतामा असन्तुष्टि बढ्ने गरेको भन्दै नीति तथा कार्यक्रम अघि बढाउँदा विज्ञहरूको सुझावलाई प्राथमिकतामा राखेको बताएका हुन् ।

उनले जनतामा निरन्तर असन्तुष्टि बढेकै कारण जेनजी आन्दोलन भएको बताए । आगामी निर्वाचनसम्म सुशासन र सेवा प्रवाहमा ठोस सुधार ल्याई सकारात्मक वातावरणसहित जिम्मेवारी हस्तान्तरण गर्नु वर्तमान सरकारको दायित्व भएको उनले बताए । उनले अवको निर्वाचनमा विज्ञहरुको सुझाव मानेर काम गर्ने जनप्रतिनिधिलाई चयन गर्न आग्रह समेत गरे ।

मन्त्री सिन्हाले पहुँचका आधारमा बजेटमा योजना पार्ने प्रवृत्तिलाई अन्त्य गर्न सरकारले यस्ता योजना तथा कार्यक्रम कटौती गरेको बताए । कार्यक्रममा विज्ञहरुले सार्वजनिक खर्चलाई परिणाममुखी, पारदर्शी र जवाफदेही बनाउनुपर्नेमा जोड दिएका थिए ।