काठमाडौं – प्रधानमन्त्री केपी शर्मा ओली र विश्व क्रिकेटका हस्ती सचिन तेन्दुलकरबीच भेटघाट सम्पन्न भएको छ । प्रधानमन्त्री निवास बालुवाटारमा प्रधानमन्त्री ओलीलाई तेन्दुलकरले भेटघाट गरेका हुन् ।
संयुक्त राष्ट्र संघको अन्तर्राष्ट्रिय बालबालिका आपातकालीन कोष(युनिसेफ)का सद्भावना दूत समेत रहेका तेन्दुलकरले भेटमा नेपालले बाल अधिकार र बालबालिकाको हित प्रवद्र्धनका निम्ति गरेको प्रयासको प्रशंसा गरे । प्रधानमन्त्री ओलीले आइतबार अपरान्ह ट्वीट गरी भेटघाटबारे उल्लेख गरेका छन् ।
प्रधानमन्त्री ओलीले ट्वीटरमा लेखेको छन्, “प्रसिद्ध खेलाडी र युनिसेफका सद्भावना दूतसँगको भेटघाटले खुशी छु । बाल अधिकार र हित प्रवद्र्धनका निम्ति नेपालले गरेको प्रयासलाई तेन्दुलकरले प्रशंसा गर्नुभएको छ ।”
Pleased to meet with @sachin_rt, famous cricket player, and UNICEF goodwill ambassador today. He appreciated the efforts undertaken by Nepal for the promotion of the rights of the children and their welfare. pic.twitter.com/Enk6S4SUak
— K P Sharma Oli (@kpsharmaoli) November 17, 2019
भेटघाटमा यूनिसेफका प्रतिनिधि, प्रधानमन्त्रीका प्रमुख सल्लाहकार विष्णु रिमाल, नवनियुक्त प्रेस सल्लाहकार सूर्य थापा लगायतको उपस्थिति रहेको थियो । उनी शुक्रबार राति काठमाडौं आएका थिए ।
शनिबार बिहान कीर्तिपुरस्थित त्रिवि क्रिकेट मैदानमा तेन्दुलकरले बाल अधिकार प्रवद्र्धनका लागि मैत्रीपूर्ण क्रिकेट खेलेका थिए । शनिबार काभ्रेको धुलीखेलमा बिताएका तेन्दुलकर आइतबार नै भारत प्रस्थान गरेका छन् ।