महिला क्रिकेटमा स्वर्ण जित्ने नेपालको सपना समाप्त

पोखरा– नेपाल १३ औं दक्षिण एसियाली खेलकुद (साग)मा महिला क्रिकेटको फाइनलमा पुग्न असफल भएको छ । शुक्रबार भएको समूह चरणको अन्तिम खेलमा श्रीलंका यू–२३ सँग ४१ रनले पराजित भयो । यससँगै श्रीलंका फाइनलमा पुग्दा नेपाल भने समूह चरणबाटै बाहिरियो ।

यसअघि भुटानलाई १० विकेटले हराएको बंगलादेश पनि फाइनलमा पुगिसकेको थियो । पोखरा क्रिकेट मैदानमा श्रीलंकाले दिएको ११९ रनको लक्ष्य पछ्याएको नेपालले २० ओभरमा ९ विकेट गुमाएर ७७ रन मात्र बनाउन सक्यो । कप्तान रुविना क्षेत्रीले सर्वाधिक १९ रन बनाइन् । यस्तै कविता कुँवरले १३, करुणा भण्डारी १३ रनमा आउट हुँदा अप्सरी बेगमले ११ रन बनाइन् ।

यसअघि टस जितेर ब्याटिङ रोजेको श्रीलंकाले २० ओभरमा ७ विकेट गुमाएर ११८ रन बनाएको थियो । श्रीलंकाका लागि लिहिनी अप्सराले सर्वाधिक ३७ रन हानिन् । यस्तै जनादी अञ्जलीले ३५ रन बनाउँदा सत्या सन्दीपानीले २२ रन जोडिन् ।

नेपालका लागि सोनु खड्का र सरस्वती कुमारीले समान २ २ विकेट लिए । अञ्जली चन्दका नाममा एक विकेट रह्यो ।