तथ्याङ्कहरूले यूकेमा ११ देखि १३ वर्ष उमेरका बालिकालाई वेबक्याम प्रयोग गरेर इन्टरनेटमा यौन क्रियाकलाप गर्न फकाउने र बाध्य पार्ने क्रम बढेको देखाएका छन्।
इन्टरनेट वाच फाउन्डेसनका अनुसार इन्टरनेटमा खोज्दा भेटिएका बालबालिकामाथि हुने यौन उत्पीडनका तस्बिरहरूको आफैँले खिचेकामध्ये ८० प्रतिशत तस्बिर ती उमेर समूहका बालिकाहरूको रहेको बताएको छ।
ADVERTISEMENT
सो संस्थाले गत वर्ष ३७ हजार आफैँ खिचेका बालबालिकाका तस्बिरहरूमाथि अध्ययन गरेको थियो। यसका प्रमुख कार्यकारीले त्यो सङ्ख्याको वृद्धिदर खतरनाक रहेको बताएकी छन्।
ADVERTISEMENT
सन्देश पढ्दै
सुसी हार्गियाभेसले घरभित्र खिचिएका त्यस्तो तस्बिर र भिडिओहरूको उपलब्धतालाई राष्ट्रिय सङ्कट भनेकी छन्।
धेरैजसो भिडिओमा बालिकाहरूले क्यामरामा हेरेको र आफूले पठाइएको सन्देश पढ्दै भनेअनुसार यौन क्रियाकलाप गरेको देखिएको छ।
फाउन्डेसनका अनुसार बाल यौन उत्पीडनका तस्बिर र भिडिओहरू भएका सबै वेबसाइटहरूको एक तिहाइ सामग्री घरमा आफैँ खिचिएको पाइएको छ।
हार्गियाभेसले भन्छिन्स् ूयी बालिकाका तस्बिर र भिडिओहरू उनीहरूलाई फकाएर, झुक्याएर र बाध्य पारेर यौन क्रियाकलाप गर्न लगाइएका हुन्। यो राष्ट्रिय सङ्कट बन्दैछ।
आज हामीले देखेको यो असहज सत्यलाई बाहिर ल्याउने यो उपयुक्त समय हो।
फकाएर झुक्याउने
उनले साना उमेरका बालबालिकाहरूसँग शयनकक्षमा मोबाइल उपलब्ध हुँदा यौन उत्पीडनका पीडितहरूको उमेर कम हुँदै गएको बताएकी छन्।
त्यो उमेरका बालिकाहरू बढी जोखिममा हुन्छन्, हार्गियाभेसले भनिन्।
उनीहरू शारीरिक रूपमा बढ्दै हुन्छन् र के भइरहेको छ भनेर निर्णय गर्न सक्ने भावनात्मक परिपक्वता हुँदैन।
उनीहरूलाई तिमीहरू राम्री छौ भनेर फकाइन्छ र कोहीसँगको सम्बन्धमा भएको विश्वासमा उनीहरूले त्यसो गर्छन्।
गैरकानुनी काम
उनले त्यस्तो तस्बिर वा भिडिओ देख्नेहरूले अन्य बालिकालाई बचाउन कारबाहीका लागि प्रहरी वा सम्बन्धित क्षेत्रमा काम गर्ने निकायलाई जानकारी दिनुपर्ने बताइन्।
मारी कोलिन्स फाउन्डेसनकी टिन्क पाल्मरले बालिकाहरू भएको यस्तो सामग्रीको सङ्ख्या बढिरहेको बताइन्।
सबै इन्टरनेट प्रयोगकर्ताहरूले बुझ्नुपर्छ कि जसले राखेको भए पनि त्यस्ता सामग्री हेर्नु पनि गैरकानुनी हो, उनले भनिन्।
नेपालको अवस्था के छ?
ईसीपीएटी इन्टरन्याश्नलले सन् २०१९ मा गरेको एक अध्ययनले देखाएका तथ्यस्
७२ प्रतिशत बालबालिकाको मोबाइलमा पहुँच छ,
इन्टरनेट प्रयोगकर्ता बालबालिकामध्ये ५२ प्रतिशतले एक्लै भएको अवस्थामा इन्टरनेट चलाउँछन्, र
१६ प्रतिशत बालबालिकाले सामाजिक सञ्जालमा अश्लील वा अशिष्ट तस्बिर वा सन्देश प्राप्त गर्छन।
स्रोत : बीबीसी नेपाली सेवा
