तीन जनामा कोरोना देखियो : देशभर संक्रमितको संख्या ४५ पुग्यो

काडमाडौँ – नेपालमा थप तीन जनामा कोरोना भाइरस (कोभिड–१९) पोजेटिभ देखिएको छ । स्वास्थ्य तथा जनसंख्या मन्त्रालयका प्रवक्ता डा. विकास देवकोटाका अनुसार २४, ६० र ७२ वर्षका पुरुषमा संक्रमण पुष्टि भएको हो ।

बीपी प्रतिष्ठान धरानमा गरिएको परीक्षणमा ३ जनामा कोरोनो पोजिटिभ देखिएको हो । यी तीनै जनालाई उदयपुरको भुल्केस्थित मस्जिदबाट मोरङको टाँडीमा रहेको नेपाली सेनाको क्वारेन्टाइनमा राखिएको थियो।

यसअघि उनीहरूको समूहका १६ मध्ये १३ जनामा कोरोना संक्रमण देखिएको थियो। यससँगै नेपालमा कोरोना संक्रमितको संख्या ४५ पुगेको छ ।

हाल धनगढीको सेती प्रादेशिक अस्पतालमा २ जना, बाग्लुङको धौलागिरी अस्पतालमा १ जना, चितवनको भरतपुरस्थित कोरोना विशेष अस्पतालमा २ जना, ललितपुरको पाटन अस्पतालमा २ जना उपचार गरिरहेका छन् ।

यस्तै वीरगञ्जको नारायणी अस्पतालमा ४ जना र विकारटनरस्थित कोरोना विशेष अस्पतालमा २४ जना उपचाररत रहेका छन् । आज संक्रमण देखिएका ३ जनाको उपचार पनि त्यहीँ हुने प्रवक्ता डा. देवकोटाले जानकारी दिए । प्राप्त जानकारी अनुसार सबैको स्वास्थ्य अवस्था सामान्य रहेको उनले बताए ।