तुलसीपुर– दाङको बेलझुण्डीस्थित कोरोना विशेष अस्पताल भरिएको छ ।


ADVERTISEMENT


पच्चीस जनाको क्षमता भएको उक्त अस्पतालमा अहिले २६ कोरोना सङ्क्रमित राखिएको अस्पतालका व्यवस्थापक द्रोण वलीले बताएका हुन् ।


ADVERTISEMENT

# # #


उनका अनुसार, पाँच जनालाई सघन उपचारकक्ष (आइसीयू) मा राखेर उपचार गरिएको छ भने अन्य २१ जनालाई ‘जनरल वार्ड’मा राखेर उपचार गरिएको छ । जनरल वार्डमा रहेका २१ जनालाई पनि अक्सिजन दिइएको छ । ‘हाम्रो क्षमता २५ जनाको हो, त्यसमा पाँच जना आइसीयु र्शैय्या छन् । तर अहिले हामी २६ जना राख्न बाध्य छौँ’, उनले भने ।

पछिल्लो समय सङ्क्रमितको सङ्ख्या बढ्दै गएकाले यसपछि आउने सङ्क्रमितलाई कसरी व्यवस्थापन गर्ने भन्ने? चिन्ता रहेको वलीको भनाई छ । अहिले अस्पतालमा घोराहीका १५, तुलसीपुरका आठ, शान्तिनगरका दुई र रोल्पाका एक रहेका छन् ।

नेपाल संस्कृत विश्वविद्यालयअन्तर्गत आयुर्वेद शिक्षण अस्पतालमा कोरोना विशेष अस्पताल सञ्चालित छ । अस्पतालका लागि तल्लो तलालाई मात्रै प्रयोग गरिएको छ । माथिल्लो तलामा बिएएमएसका कक्षा सञ्चालन भइरहेका छन् । माथिल्ला दुई र तीन तलामा पनि अस्पताल सञ्चालन गर्न पाएमा ५५ शैय्यासम्म सञ्चालन गर्न सकिने सामथ्र्य रहेको वलीले बताए। ‘तल्लो तलामा बिरामी राखिएको छ, यस्तो अवस्थामा माथिल्लो तलामा कक्षा सञ्चालन हुँदा सङ्क्रमणको पनि डर छ’, थप्दै उनले भने, ‘त्यसैले माथिल्ला तलामा पनि अस्पताल सञ्चालन गर्न सकिएमा धेरै सङ्क्रमित राख्न सकिन्छ ।’

अहिले अस्पताल पनि भरिएको भन्दै बिरामीले शैय्या पाउन सक्ने सम्भावना न्यून रहेको वलीको भनाइ छ । सामाजिक दूरी नै संक्रमण प्रचारप्रसारको मुख्य कारण रहेको बताउँदै उनले कोरोनाबाट बच्नका लागि पुर्ण रुपमा स्वास्थ्य सुरक्षाका मापदण्डहरु पालना गर्न आमव्यक्तिलाई आग्रह समेत गरेका छन् ।

यस्तै, अब सङ्क्रमितले जनप्रतिनिधि र नजिकैको स्वास्थ्य संस्थामा सम्पर्क गरेमा व्यवस्थापनमा सहज हुने तुलसीपुर उपमहानगरपालिकाका जनस्वास्थ्य प्रवर्धन शाखाका निरीक्षक विमल केसीले बताए ।

‘अस्पताल ऋणमा चलिरहेको छ’

व्यवस्थापक वलीलेअहिले अस्पताल ऋणमा चलिरहेको बताएका छन् । उनका अनुसार, अक्सिजन मात्रै दैनिक रु. ५० हजारदेखि एक लाखसम्म खर्च हुने गरेको छ ।

अन्य व्यवस्थापन खर्च गरी जम्मा रु. दुई लाखसम्म खर्च हुने गरेको भए पनि अहिले अस्पताललाई सरकारले रकम उपलब्ध नगराएको उनको गुनासो रहेको छ । उनले जनाए अनुसार गएको वर्ष असोजदेखि अहिलेसम्म लुम्बिनी प्रदेश सरकारबाट बजेट आएको छैन । ‘गएको असोजदेखि एक रुपैयाँ पनि आएको छैन । त्यसैले अहिले ऋणदान गरेर चलाएका छौँ’, उनले भने । रासस