काठमाडौँ– प्रधामन्त्री केपी शर्मा ओलीले राष्ट्रिय ध्वजावाहक नेपाल वायु सेवा निगम (नेपाल एयरलाइन्स) ले आफ्नो सेवा विस्तारसंगै राष्ट्रिय पहिचान अभिवृद्विमा समेत उल्लेख्य भुमिका निर्वाह गरेको जनाएको छ ।
ADVERTISEMENT
निगम स्थापना दिवका अवसरमा शुभकामना व्यक्त गर्दै ओलीले आफ्नो स्रोत, साधन र जनशक्तिको अधिकतम उपयोग गरी आफूले पुर्याउनुपर्ने सेवा प्रदान गरी राष्ट्रिय पहिचान अभिवृद्धि गर्न निगमले उल्लेखनिय भूमिका निर्वाह गरेको बताएका हुन् ।
ADVERTISEMENT
सो अवसरमा उनले निगमले आफ्नो कार्य सम्पादन र सेवा प्रवाहलाई परम्परागत ढाँचामा सीमित नराखी नयाँ–नयाँ अवधारणासहित भूमिकालाई थप व्यापक बनाई प्रभावकारी बनाउने विश्वास समेत व्यक्त गरेका छन् ।
साथै उनले कोभिड–१९ महामारीमा पनि निगमले निर्वाह गरेको सक्रियता र सराहनिय कामलाई भविष्यमा पनि निरन्तरता दिई आफ्नो सेवालाई विश्वसनिय एवम् पारदर्शी बनाई राष्ट्रिय आकांक्षा पुरा गर्न निगम सफल बनोस् भनी शुभेच्छा प्रकट गरेका छन् ।
यसैगरि, पर्यटनमन्त्री लिलानाथ श्रेष्ठ, पर्यटन सचिव यादवप्रसाद कोइरालाले पनि शुभकामना सन्देश दिँदै निगमको सेवालाई थप विश्वसनीय र प्रभावकारी बनाउन लाग्नुपर्नेमा जोड दिएका छन् । सोहि क्रममा निगमका महाप्रवन्धक डिमप्रकाश पौडेलले भने निगमलाई व्यवसायिक, पारदर्शी र प्रविधिको उच्चतम उपयोग गर्दै निगमको गौरवशाली साख जोगाउनेतर्फ केन्द्रित भएको उल्लेख गरेका छन् ।
निगमले हवाई बजारमा आफ्नो उपस्थिति दरिलो बनाउने गरी रणनीतिक कार्ययोजना (एकीकृत व्यवसायिक योजना, २०२१(२०३०) तर्जुमा गरी कार्यान्वयन गर्ने तहमा पुगिसकेको अवस्थामा कोभिड महामारीलाई मात्रै व्यवयासिक उपलब्धिको बाधक बनाइनु हुदैन भन्नेमा आफूहरु प्रतिबद्धताका साथ लागि परेको उनको भनाई छ ।
विसं २०१५ असार १७ (सन् १९५८ जुलाई १) मा स्थापना भएको निगम आफ्नो कार्यकालको ६३ औं वसन्त पार गर्दै ६४ औँ वर्षमा प्रवेश गरेको छ ।
देशलाई आइपरेका विभिन्न विपत्तिमा उडान सारथी बनेर होस् या भूकम्प र नाकाबन्दीका बेला पुर्याएको योगदान स्मरणयोग्य रहेको निगमले अहिलेको कोभिड–१९ महामारीका सन्दर्भमा पनि मेडिकल चार्टर्ड उडान, उद्धार उडानलगायतका सेवालाई निरन्तरता दिएको छ ।
निगमसँग हाल भारतका तीनसहित नौ गन्तव्यमा अन्तर्राष्ट्रिय उडानका लागि दुई वाइड बडी र दुई न्यारो बडी जहाज रहेका छन् । रासस
