नेपाली कांग्रेसका शीर्ष नेताले देशभरका चुनावी सभालाई सम्बोधन गर्ने

काठमाडौं– नेपाली कांग्रेस निर्वाचन परिचालन मुल समितिका संयोजक बालकृष्ण खाँणले आगामी मंसिर १० र २१ गते हुने प्रदेश र प्रतिनिधि सभाको निर्वाचनको लागि पार्टीका शीर्ष नेताहरुले ७ वटै प्रदेशमा चुनावी सम्बोधन गर्नेगरि छिट्टै कार्यतालिका सार्वजनिक गर्ने जनाएका छन् ।

आईतबार रिपोर्टर्स क्लबमा खाँणले पार्टी सभापतिदेखि लिएर शीर्ष नेताहरु सबैजना एकै ठाउँमा चुनावी सम्बोधनको लागि जानेगरि छिट्टै कार्यतालिका सार्वजनिक गर्ने बताएका हुन् । उनले भने, “७ वटै प्रदेशका मुख्य मुख्य केन्द्रहरुमा हाम्रा पार्टीका शीर्ष नेताहरुले सम्बोधन गर्नुहुन्छ, हामीले त्यही अनुसार कार्यतालिका बनाएका छौं, चाँडै कार्यतालिका सार्वजनिक गर्छौं ।”

नेता खाँणले ठूला नेताहरुले एकैचोटी ठूला सभाहरुमा सम्बोधन गर्ने र मझौला नेताहरुले त्यही अनुसार प्रदेशका विभिन्न केन्द्रहरुमा सम्बोधन गर्ने, जिल्लाका प्रभावशाली नेता तथा अहिले उमेदवार नबनेकाहरुले पनि त्यहीअनुसार चुनावी प्रचारप्रसार गर्ने तयारी भैरहेको जनाए ।

त्यस्तै उनले बागी उमेदवारहरुले उमेदवारी फिर्ता नलिए स्वतः पार्टीको विधानले नै कारवाही गर्ने जनाए । उनले भने, “हामीले कारबाही गर्न जरुरी छैन, विधानमा नै बडो स्पष्टसँग लेखिएको छ, यसरी उमेदवारी दिने हाम्रा नेता तथा कार्यकर्ताहरुले फिर्ता नलिईकन चुनावी प्रचारमा हिँड्नुभयो भने स्वतः कारबाही हुन्छ । साधारण सदस्य नै खारेज हुन्छ, प्रस्तावक र समर्थक पनि साधारण सदस्य नै नरहने गरी कारवाही गर्छौं ।”