गैरीगाउँको जुवा खालमा प्रहरीको छापा, पाँच लाखसहित आठ जना पक्राउ

काठमाडौं –  काठमाडौं को गैरीगाउँस्थित जुवाको खालबाट  पाँच लाख रुपैयाँसहित आठ जनालाई प्रहरीले पक्राउ गरेको छ ।

स्थानीय नवराज पौडेलको तरकारी लगाउने भाडाको जग्गामा टहरा बनाई बसेको स्थानमा पैसाको हारजित हुने गरी कौडा खेलिरहेको अवस्थामा उनीहरुलाई पक्राउ गरिएको महानगरीय प्रहरी परिसरका प्रहरी उपरीक्षक रमेशकुमार बस्नेतले जानकारी दिए ।

कौडा खेलिरहेको छ भन्ने विशेष सूचनाका आधारमा महानगरीय प्रहरीवृत बौद्धबाट परिचालित प्रहरी टोलीले गए राति उनीहरुलाई पक्राउ गरिएको हो ।

कौडाको खालबाट  पाँच लाख ११ हजार ५०० रुपैयाँ नगदसमेत बरामद गरिएको  प्रहरीले एक विज्ञप्ति जारी गरी जनाएको छ । उनीहरुको विषयमा प्रहरीवृत्त बौद्धले थप अनुसन्धान गरिरहेको छ । रासस