अलैँचीको भाउ झन् घट्यो

काठमाण्डौं-सोलुखुम्बुको अलैँची पकेट क्षेत्र गँुदेलमा अलैँचीको मूल्य गत वर्षको तुलना यस वर्ष घट्दा कृषक मारमा परेका छन् । गत वर्षको तुलनामा उत्पादन बढे पनि आम्दानी घटेको कृषकले बताएका छन् ।

स्थानीय बजारमा गत वर्ष प्रतिमन (४० किलो) ६० हजारले कारोबार भइरहेको अलैँची यस वर्ष ५८ प्रतिशतले गिरावट भई प्रतिमन २५ हजारमा मात्र कारोबार भइरहेको गुँदेलका स्थानीय व्यापारी सिङकेराम राईले बताए । राईका अनुसार गत वर्ष गुन्देल गाविसमा छ करोड बराबरको अलैंची उत्पादन भएको थियो तर यस वर्ष करिब साढे तीन करोड बराबरको मात्र उत्पादन भएको छ ।

गत वर्ष महाकुलुङ–५, गुँदेलका धनगञ्ज राईले छ मन उत्पादन गरेर बेच्दा तीन लाख ६० हजार आम्दानी भएको थियो । यस वर्ष गत वर्षको तुलनामा उत्पादन बढ्यो तर आम्दानी भने घटेको छ । यस वर्ष राईले साढे सात मन बेच्दा एक लाख ८२ हजार पाँच सयमात्र आम्दानी भएको राईले बताए । राई बताए, खै यसपाली त धेरै फल्यो तर गत वर्षको तुलना थोरै मात्र आम्दानी भयो ।

महाकुलुङ–४, गँुदेलका कृषक छलकराम राईका अनुसार यसवर्ष मूल्य घटेपछि व्यापारी पनि चुपचाप बसेका छन् । गत वर्षसम्म बजार राम्रो भएकोले व्यापारीले समयमा नै सङ्कलन गरेको भए पनि यसवर्ष उनीहरूको उत्साह पनि घटेको छ । स्थानीय व्यापारी नारद राईले भने, मूल्य नभएपछि कृषकले बेच्न पनि चाहेका छैनन् भने थोरै मूल्यमा सङ्कलन गर्दा दाम हालिदिएन भनेर गुनासो मात्र गर्छन् । राईका अनुसार यसपर्ष कृषकको अलैँची कृषकसँगै रहेको छ ।
गत वर्ष पकेट क्षेत्र गुँदेलबाट चार करोडभन्दा बढिको अलैँची निर्यात भएको थियो तर यस वर्ष एक करोडको पनि निर्यात हुन मुस्किल हुने स्थानीय व्यापारी नारद राईले बताए ।