सबै जिल्लामा पुस्तक पुगेको छ : जनक शिक्षा

काठमाडौं – विद्यालयले पाठ्यपुस्तक खरिद नगर्दा विद्यार्थीले समयमा पुस्तक प्राप्‍त गर्न नसकेको जनक शिक्षा सामग्रीले जनाएको छ । स्थानीय विक्रेताकोमा पुस्तक उपलब्ध हुँदहुँदै समयमा विद्यालयले खरिद गर्न नसक्दा विद्यार्थीले पाउन नसकेका हुन् ।

जनक शिक्षा सामग्रीले कक्षा ४ देखि १० सम्मको पाठ्यपुस्तक ७७ जिल्लामा ढुवानी गरी जेठ ५ गतेदेखि विक्री वितरण गर्न थालिसकेको छ । सामग्रीका अनुसार स्थानीय विक्रेताले प्रादेशिक कार्यालयबाट पुस्तक नलैजाँदा विद्यार्थीले पाउन सकेका थिएनन् ।

विद्यालयले पाठ्यपुस्तक नपाएको भए स्थानीय विक्रेतालाई उपलब्ध गराउन सामग्रीले अनुरोध गरेको छ । कुन कक्षा र कति पुस्तक नपाएको सम्पूर्ण विवरण प्रादेशिक कार्यालय, सम्बन्धित स्थानीय तह, शिक्षा विकास तथा समन्वय एकाइ र केन्द्रीय कार्यालयमा बुझाउन सामग्रीले अनुरोध गरेको छ ।