राष्ट्रिय सभा निर्वाचनमा उम्मेदवारको खर्च सीमा साढे तीन लाख मात्र

काठमाडौँ– निर्वाचन आयोगले आगामी माघ २४ गते हुने राष्ट्रिय सभा सदस्य निर्वाचनमा भाग लिने उम्मेदवारहरूले निर्वाचनको प्रचार प्रसारको क्रममा खर्च गर्न पाउने अधिकतम सीमा तोकेको छ । आयोगको आज बसेको बैठकले उम्मेदवारले निर्वाचन प्रचार प्रसारका लागि साढे तीन लाख रुपैयाँ भन्दा बढी खर्च गर्न नपाउने भएको हो ।

निर्वाचन आयोग ऐन, २०७३ को दफा २४ तथा राष्ट्रिय सभा सदस्य निर्वाचन अध्यादेश, २०७४ को दफा ६४ बमोजिम निर्वाचन खर्चको अधिकतम हद रु.३,५०,०००।– तोक्ने आयोगले निर्णय गरेको हो ।

यसमा मतदाता नामावली खरिददेखि सवारी इन्धन, घोडालाई प्रयोग हुने दानादेखि प्रचार प्रसार सामाग्रीसम्म रहेका छन् ।

यसैगरी, आयोगले राष्ट्रिय सभा सदस्य निर्वाचन प्रयोजनका लागि ‘अल्पसंख्यक समुदाय’ तोकी अविलम्ब नेपाल राजपत्रमा सूचना प्रकाशनसमेत गराउने व्यवस्था मिलाउन गृह मन्त्रालयलाई लेखी पठाउने निर्णय गरेको छ ।

यस्तै, आयोगले राष्ट्रिय सभा सदस्य निर्वाचनमा उम्मेदवार मनोनयनको औपचारिक पत्र प्रदान गर्ने पदाधिकारीको आधिकारिक दस्तखत नमुना २०७४ माघ ३ गतेसम्ममा निर्वाचन आयोग, कान्तिपथ काठमाडौंमा पठाइसक्नु हुन राजनीतिक दलहरुलाई सूचित गर्ने निर्णय गरेको प्रवक्ता नवराज ढाकालले जानकारी दिए ।