काठमाडौं – गरिमा विकास बैंक लिमिटेडले आफ्नो २०औँ वार्षिकोत्सवको अवसरमा आगामी मंसिर ५ गते ‘गरिमा रोड रेस २०८३’ आयोजना गर्ने भएको छ ।
‘स्वास्थ्यका लागि खेलकुद’ भन्ने नारासहित बैंकले प्रतियोगिताको तेस्रो संस्करण आयोजना गर्न लागेको हो । काठमाडौंमा सञ्चालन हुने प्रतियोगितामा खुला तथा कर्पोरेट विधामा गरी करिब १ हजार ५ सय धावक सहभागी हुने अपेक्षा गरिएको बैंकले जनाएको छ ।
ADVERTISEMENT
प्रतियोगिताअन्तर्गत खुलातर्फ महिला तथा पुरुष दुवै समूहका लागि १० किलोमिटर र कर्पोरेटतर्फ ५ किलोमिटर दौड सञ्चालन हुनेछ । खुला विधामा बैंकको बालुवाटारस्थित केन्द्रीय कार्यालयबाट सुरु हुने दौड बूढानीलकण्ठ नगरपालिका–३ को कार्यालय परिसर पुगेर पुनः बालुवाटारमै समापन हुनेछ । त्यसैगरी, कर्पोरेट विधाको दौड बालुवाटारबाट सुरु भई बाँसबारीस्थित न्युरो अस्पताल पुगेर पुनः बालुवाटारमै फर्किनेछ ।
प्रतियोगितामा खुलातर्फ प्रथम हुने महिला तथा पुरुष धावकले जनही ५० हजार रुपैयाँ, द्वितीयले ३५ हजार, तृतीयले २० हजार, चौथोले १५ हजार र पाँचौँ हुनेले १० हजार रुपैयाँ पुरस्कार प्राप्त गर्नेछन् ।
ADVERTISEMENT
त्यस्तै, कर्पोरेटतर्फ प्रथम हुनेले ३० हजार, द्वितीयले २० हजार, तृतीयले १५ हजार, चौथोले १० हजार र पाँचौँ हुनेले ५ हजार रुपैयाँ नगद पुरस्कार पाउनेछन् । दौड पूरा गर्ने सबै सहभागीलाई प्रमाणपत्र तथा मेडलसमेत प्रदान गरिने बैंकले जनाएको छ ।
प्रतियोगितामा सहभागी हुन इच्छुक धावकहरूले कात्तिक २८ गतेदेखि मंसिर २ गतेसम्म अनलाइनमार्फत एक सय रुपैयाँ दर्ता शुल्क बुझाएर नाम दर्ता गराउन सक्नेछन् । कर्पोरेट विधामा नेपाल राष्ट्र बैंक, नेपाल धितोपत्र बोर्ड, नेपाल स्टक एक्सचेन्ज, बैंक तथा वित्तीय संस्था, बीमा कम्पनी तथा भुक्तानी सेवाप्रदायक संस्थामा कार्यरत स्थायी कर्मचारीले मात्र सहभागिता जनाउन पाउनेछन् ।
प्रतियोगितालाई व्यवस्थित र प्रतिस्पर्धात्मक बनाउन बैंकले एनआरएस स्पोर्ट्स फाउन्डेसनसँग सहकार्य गरेको छ । खेलकुदमार्फत स्वस्थ, सक्रिय र अनुशासित समाज निर्माणमा योगदान पुर्याउने उद्देश्यले प्रतियोगिता आयोजना गर्न लागिएको बैंकले जनाएको छ ।
