आर्सनलद्वारा क्रिष्टल प्यालेस माथी शानदार जित

काठमाडौं-इंग्लिश प्रिमियर लिग फुटबलमा आर्सनलले क्रिष्टल प्यालेसलाई सहजै हराएको छ । शनिबार राति भएको खेलमा आर्सनलले क्रिष्टललाई ४–१ गोल अन्तरमा पराजित गरेको हो । घरेलु मैदानमा भएको खेलमा आर्सनललाई जित दिलाउन नाचो मोनरियल,एलेक्स ओबी, लौरेन्ट र एलेक्जेन्डर लाकाजेटले समान एक एक गोल गरे । आर्सनलले चारै गोल पहिलो हाफको २५ मिनेट भित्र भएको थियो । क्रिष्टलका लुका मिलिभोजेभिकले एक गोल फर्काए ।

योसँगै जित बिहीन यात्राको शृङ्खलालाई आर्सनलले रोकेको हो । छैटौँ मिनेटमा नाचो मोनरियलले गोल गर्दै टिमलाई सुरुवाति अग्रता दिलाए । १० औँ मिनेटमा इवोबीले गोल गर्दै अग्रता दोब्बर पारे । १३ औँ मिनेटमा लोरेन्ट कोशिएल्नी तथा २२ औँ मिनेटमा एलेक्सान्ड्र लाकाजेटीले गोल गरेपछि आर्सनलले पहिलो हाफमा ४–० को अग्रता लियो।

७८ औँ मिनेटमा मिलिवोजेविकले क्रिष्टल प्यालेसका लागि एक गोल फर्काए पछि आर्सनल ४–१ ले विजयी भयो । जितपछि छैटौँ स्थानको आर्सनलको २४ खेलबाट ४२ अंक भएको छ। ऊ पाँचौँ स्थानको टोटनह्याम भन्दा दुई अंकले पछि रहेको छ । पराजित क्रिष्टल २५ अंकसहित लिगको १३ औं स्थानमा छ । लिगको शिर्ष दुई स्थानमा डर्बी क्लब म्यानचेस्टर सिटी र युनाइटेड रहेको छ ।

राति नै भएका अरु खेलमा लेस्टर सिटीले वाट्फोर्ड तथा स्टोक सिटीले हडर्ल्सफिल्डलाई समान २–० ले हरायो । यस्तै वेष्ट ह्याम र बोर्नमाउथ तथा एभर्टन र वेष्ट ब्रोमले १–१ को बराबरी खेल्दै अंक बाँडेका छन्