काठमाडौं- काठमाडौंमा अन्तर्राष्ट्रियस्तरको फिटनेस प्रतियोगिता ‘स्ट्रीट गेम्स इन्टरनेसनल २०२६’ आयोजना हुने भएको छ । नेपाली युवा फिटनेस तथा क्यालिस्थेनिक्स (NYFC) को आयोजनामा आगामी डिसेम्बर १८ देखि २० गतेसम्म प्रतियोगिता सञ्चालन हुन लागेको हो ।
‘ब्याटल अफ द फिटेस्ट’ अर्थात् सबैभन्दा उत्कृष्ट शारीरिक क्षमता भएका खेलाडीबीचको प्रतिस्पर्धा मुख्य नारासहित आयोजना हुन लागेको प्रतियोगितामा करिब ४०० खेलाडी सहभागी हुने आयोजकले जनाएको छ ।
प्रतियोगितामा एरोबिक क्षमता, शक्ति सहनशीलता, एनारोबिक क्षमता र एनारोबिक पावर गरी फिटनेसका चारवटा आयाममा खेलाडीको क्षमता परीक्षण गरिनेछ । विभिन्न शारीरिक चुनौतीमार्फत खेलाडीको शक्ति, गति, सहनशीलता र उच्च कार्यक्षमताको मूल्याङ्कन गरी उत्कृष्ट खेलाडी छनोट गरिने आयोजकको भनाइ छ ।
प्रतियोगिता काठमाडौंको नारायणचौर, नक्साल तथा बागमती करिडोर र पशुपति क्षेत्रमा सञ्चालन हुनेछ । प्रतियोगितामा ओपन पुरुष, ओपन महिला, जुनियर (२१ वर्षमुनि) र मास्टर्स (४० वर्षमाथि) गरी विभिन्न विधामा प्रतिस्पर्धा हुनेछ ।
ओपन पुरुष तथा महिला विधाका विजेताले क्रमशः एक हजार, पाँच सय र दुई सय ५० अमेरिकी डलर पुरस्कार प्राप्त गर्नेछन् । त्यस्तै, जुनियर र मास्टर्स विधाका विजेताले पहिलो, दोस्रो र तेस्रो स्थानका लागि क्रमशः २००, १३० र ७० अमेरिकी डलर पुरस्कार पाउनेछन् ।
आयोजकका अनुसार प्रतियोगिताको उद्देश्य युवापुस्तालाई शारीरिक तन्दुरुस्तीप्रति प्रेरित गर्नुका साथै नेपाललाई अन्तर्राष्ट्रिय फिटनेस तथा खेल पर्यटनको गन्तव्यका रूपमा स्थापित गर्नु हो । ‘भिजिट नेपाल थ्रु स्पोर्ट्स एन्ड फिटनेस’ अवधारणामार्फत अन्तर्राष्ट्रिय खेलाडीलाई नेपालमा आमन्त्रण गरी नेपालको पर्यटन, संस्कृति र प्राकृतिक सम्पदाको प्रवर्द्धन गर्ने लक्ष्यसमेत राखिएको छ ।
प्रतियोगिताको आयोजनामा गोकर्णेश्वर नगरपालिकाले प्रवर्द्धकको भूमिका निर्वाह गर्नेछ ।


























