ठगी धन्दा गर्ने एकजना २५ थान पासपोर्टसहित प्रहरी फन्दामा

काठमाडौं–काठमाडौंको पुतलिसडक स्थित ‘क्याची एजुकेशन एण्ड ट्रेनिङ कन्सल्टेन्सी’को आवरणमा अवैध रुपमा बिना ईजाजत वैदेशिक रोजगार ब्यवसाय संचालन गर्दै आएका पुरुषोत्तम खड्का पक्राउ परेका छन् । काठमाडौंको गागलफेदी–८ स्थायी घर भएका खड्कालाई महानगरीय अपराध महाशाखाबाट खटिएको प्रहरी टोलीले शनिवार पक्राउ गरेको हो ।

खड्काले विभिन्न ब्यक्तिहरुलाई प्रलोभनमा पारेर ७ देखी १२ लाखसम्म लिई वैदेशिक रोजगारीको लागी अजरवैजान, पोल्याण्ड, साउथ अफ्रिका, स्टोनिया माल्टा लगायतका देशहरुमा पठाएर अलपत्र समेत पार्ने गरेको अपराध महाशाखाले जनाएको छ ।

शैक्षिक परामर्शका लागी खोलिएको कन्सल्टेन्सीमार्फत बिना ईजाजत वैदेशीक रोजगारीमा जान चाहने ब्यक्तिहरुलाई एजेन्टमार्फत सम्पर्कमा ल्याएर उनले विदेश पठाउने गरेका थिए । यसरी आवश्यक कागजात समेत आफैं तयार पारेर अवैध कार्य गर्दै आएका खड्काको साथबाट २५ थान नेपाली राहदानी बरामद गरिएको र उनलाई आवश्यक कारबाहीको लागी वैदेशिक रोजगार विभाग पठाईएको महाशाखाले जनाएको छ ।