मोर्चाले आन्दोलनको घोषणा गर्नु आश्चर्यजनकः मन्त्री नायक

काठमाडौँ– कानुन, न्याय तथा संसदीय मामिलामन्त्री अजयशङ्कर नायकले मधेसी मोर्चाले सरकारसँगको छलफलमा सहमति जनाउने तर बाहिर भने आन्दोलनको घोषणा गरेर नाटकीय चरित्र देखाएको आरोप लगाएका छन् ।

आज आयोजित अन्तक्रियामा उनले भने, “मोर्चाको विचार नाटकीय रुपमा बाहिर आएको छ । सरकार मोर्चाको मागको हदैसम्म लचकता अपनाएर सम्बोधन गर्न लागिपरेको बेला मोर्चाले आन्दोलनको घोषणा गर्नु आश्चर्यनजक छ ।”

तोकिएको समयमा स्थानीय तहको निर्वाचन हुनेमा ढुक्क हुन आग्रह गर्दै मन्त्री नायकले संसदमा दर्ता भएको दोस्रो संविधान संशोधन प्रस्तावमा मोर्चाले नै उठाएका सबै माग समेटिएकाले अपुग भएका कुरा छलफलमा बसेर टुङ्गो लगाई निर्वाचनमा जानुपर्ने बताए । “सरकार यतिसम्म लचक भएको छ कि दुई चरणमा निर्वाचन गराउन पनि तयार छ । तर मोर्चाको मनसाय बुझन सकिएन । भित्र (सरकारसँग) सहमति जनाउने बाहिर विरोध गर्दै हिँड्ने ?”

नेपाली काँग्रेसका नेता रमेश रिजालले मधेसलाई बाहिर राखेर निर्वाचन हुन नसक्ने भएकाले मोर्चालाई निर्वाचनमा जाने वातावरण बनाउन सरकारलाई आग्रह गरे । उनले भने, “प्रधानमन्त्रीले छलफलमा मोर्चाका सबै माग पूरा हुन्छ भन्ने तर कार्यान्वयनमा नदेखिने मोर्चाको आरोप छ । अविश्वासको वातावरण हटाएर विश्वासको वातावरण बनाउनुपर्यो । मोर्चा निर्वाचनमा जान चाहन्छन् ।”

नेकपा (एमाले)का उपाध्यक्ष भीमबहादुर रावलले कुनैपनि हालतमा निर्वाचन सार्न नहुने भन्दै जनताको मूल्याङ्कनको सामना गर्न सक्ने भए मोर्चाले निर्वाचनमा भाग लिनुपर्छ भने । उनले सरकारले मोर्चाको सहमतिमा दोस्रो संशोधन प्रस्ताव ल्याएको भने पनि मोर्चाले विरोध गरिरहेकाले सरकारले एकलौटी रुपमा प्रस्ताव ल्याएको आरोप लगाए ।

“सरकारले एमालेको पनि दोस्रो संशोधन प्रस्तावमा सहमति भएको भन्ने अभिव्यक्ति दिएको छ । यो सरासर गलत हो । यसमा एमालेको कुनै संलग्नता छैन । तर मोर्चा लोकतन्त्र र जनताको पक्षमा छन् भने निर्वाचनमा भाग लिनुपर्छ ।”