किर्तीमानी आरोही कामिरिताको काठमाडौँमा न्यानो स्वागत (फोटोफिचर)

काठमाडौँ– सर्वोच्च शिखर सगरमाथाको २२ औँ पटक सफल आरोहण गरी विश्वकीर्तिमान कायम राखी फर्किएका कामी रिता शेर्मालाई आइतबार त्रिभुवन अन्तर्राष्ट्रिय विमानस्थलमा परिवारजनका सदस्यहरुले स्वागत गरेका छन् ।

कामिरितासहित १४ जनाको टोलीले बुधबार बिहान साढे ८ बजे सगरमाथाको शिखरमा पाइला टेकेको हो । जसमा ७ जना विदेशी र ७ जना नेपाली आरोही थिए । त्यही दिन उनीहरुसहित ९४ जना सगरमाथाको चुचुरोमा पुगेका थिए ।

यसअघि आप्पा शेर्पा र फुर्वा तासि शेर्पासहित कामिरिताको नाममा २१ पटक सगरमाथा पुगेको कीर्तिमान थियो । २२ औँ पटक सगरमाथा पुगेर कामिरिताले विश्व कीर्तिमान आफ्नो नाम राखेका हुन् । आप्पा र फुर्वाले सगरमाथा आरोहणबाट छाडिसकेका छन् ।

सोलुखुम्बुको थाने घर भएका कामिरिता सबैभन्दा पहिले सन् १९९४ मा २२ वर्षको उमेरमा नै सगरमाथाको शिखरमा पुगेका थिए । दुई वर्ष पहिले उनी चीनतर्फबाट पनि सगरमाथाको शिखरमा पुगेका थिए ।
तस्बिरहरु : रासस