एमालेको अवरोधपछि संसद् बैठक भोलि एक बजे सम्मका लागि स्थगित

काठमाडौँ– स्थानीय तहको संख्या बढाउने निर्णय फिर्ताको माग गर्दै प्रमुख प्रतिपक्षी नेकपा एमालेसहितका प्रतिपक्षी गठबन्धनको अवरोधका कारण ब्यवस्थापिका संसदको बैठक आजपनि कार्यसूचीमा प्रवेश गर्न सकेन ।

दिउँसो एक बजेका लागि बोलाईएको बैठक एमाले सांसदहरुको अवरोधका कारण ४ बजेका लागि सारिएपनि कार्यसूचीमा भने प्रवेश गर्न पाएन । झण्डै एक घण्टा ढिला गरी सुरु भएको बैठकमा एमालेका प्रमुख सचेतक भानुभक्त ढकालले आफुहरुको मागप्रति सरकार गम्भीर नदेखिएकाले सदनको कामकारवाही अगाडि बढ्न नसक्ने बताएका थिए ।

ढकालले धारणा राखे लगत्तै आ–आफ्नो ठाउँमा उठेर मौन बिरोध गरेपछि सभामुख ओनसरी घर्तीले बैठक भोली दिउँसो एक बजेसम्मका लागि स्थगित गरिन् । संसद बैठक बारम्बार स्थगित भएपछि नयाँ आर्थिक बर्षको प्रिबजेटमाथिको छलफल अन्योलमा परेको छ भने संवैधानिक ब्यवस्थाअनुसार आगामी जेठ १५ गते ल्याउने तयारी भएको पूर्ण बजेटको कार्यतालिका समेत प्रभावित हुने देखिएको छ ।

एमाले सांसदहरुले अवरोध गर्ने संकेतका बीच गत मंगलवार र बुधवारको बैठक समय निर्धारण गरेरपनि स्थगित भएको थियो भने हिजोको दोस्रो बैठक र आजको पहिलो बैठकमा भने उनीहरुले आ–आफ्नो ठाउँमा उठेर बिरोध जनाएका थिए । सहमतिका लागि भन्दै सभामुख घर्तीले आज बोलाएको प्रमुख तीन दलको बैठकमा शीर्ष नेताहरु नै अनुपस्थित भए । प्रधानमन्त्री पुष्पकमल दाहाल र कांग्रेस सभापति शेरबहादुर देउवा बिभिन्न कार्यक्रममा ब्यस्त भएपछि एमाले अध्यक्ष केपी शर्मा ओली समेत बैठकमा नआएको संसद सचिवालय स्रोतले जनाएको छ ।

सभामुख घर्तीसँगको छलफलमा प्रमुख सचेतकहरुले समस्या समाधानका लागि शीर्ष तहमै छलफल गर्नु पर्ने बताएपछि भोली बिहान दलीय छलफलको तयारी भएको सभामुखका प्रेस सल्लाहकार बबिन शर्माले जानकारी दिए ।