बंगलादेशमा पढ्न गएका नेपाली छात्राका बारेमा दिएको अभिव्यक्तिप्रति कानुनमन्त्रीले मागे माफी

काठमाडौँ– कानुन, न्याय तथा संसदीय मामिलामन्त्री शेरबहादुर तामाङले बंगलादेश पढ्न जाने छात्राहरुबारे आफूले दिएको अभिव्यक्ति गलत भएको स्वीकार्दै माफी मागेका छन् । आज एक विज्ञप्ती जारी गर्दै मन्त्री तामाङले क्षमा मागेका हुन् ।

शुक्रबार मन्त्री तामाङले राजधानीको चुच्चेपाटीस्थित प्राक्सिस इन्टरनेसनल एकेडेमीमा ‘बंगलादेशमा चिकित्सा शिक्षा पढ्न जाने छात्राहरूमाथि यौन शोषण भइरहेको’ बताएका थिए। उनले ‘डाक्टर पढ्न बंगलादेश जाने छोरी–चेलीबारे आज म कथा खोल्छु’ भन्दै दिएको भाषणको भिडियो सार्वजनिक भएपछि मन्त्री तामाङ विवादमा तानिएका छन्।

विज्ञप्ती जारी गर्दै उनले बंगलादेश पढ्न गएका केही विद्यार्थीले आत्महत्या गरेको प्रसंग निकाल्दै नेपाली छोरीचेली हिंसामा नपरून् भनेर सचेत गराउन खोजेको प्रस्टीकरण दिएका छन् ।

सम्बन्धित समाचार : विवेकशील साझा पार्टीद्वारा कानुनमन्त्री तामाङको राजीनामा माग

‘मेरो उक्त दिनको भनाइले बंगलादेशमा अध्ययनरन र अध्ययन गरी फर्केका छात्राहरुप्रति पर्न गएको चोटप्रति म क्षमा माग्न चाहन्छु ।’ जारी विज्ञप्तीमा भनिएको छ, ‘महिलाको आत्मसम्मान, हिंसामुक्त समाज र नारी अश्मिताको रक्षामा मेरो सदैव प्रतिवद्धता र क्रियाशिलता रहिरहनेमा सबैलाई विश्वास दिलाउन चाहन्छु ।’

यसअघि झापा, बिएन्डसी अस्पतालका सञ्चालक दुर्गा प्रसाईंले पनि बंगलादेश जाने छात्रामाथि हुबहु टिप्पणी गरेका थिए। त्यसको पनि भिडियो सार्वजनिक भएको थियो ।