२५ लाखमै फक्सवागनको नयाँ पोलो १.० बजारमा, यस्ता छन् विशेषता

काठमाडौँ– फक्सवागनको नेपालका लागि आधिकारिक विक्रेता पूजा इन्टरनेशनल नेपाल प्रा.लि.ले फक्सवागनको नयाँ मोडलको गाडी पोलो १.० नेपाली बजारमा भित्र्याएको छ । कम्पनीले आइतबार काठमाडौंमा पत्रकार सम्मेलनकोे आयोजना गरी नयाँ गाडी सार्वजनिक गरेको हो ।

९९९ सीसी र ७६ एजपी इन्जिन क्षमता रहेको उक्त गाडी इन्धन बचतमा कोशेढुंगा बन्ने कम्पनीको दावी छ । यसअघि नेपाली बजारमा फल्क्सवागन पोलो गाडी १६०० र १२०० सीसीमा उपलब्ध थियो । आर्थिक वर्ष ०७५/०७६को बजेटमा व्यवस्था भए अनुसार १००० सीसी भन्दा माथिका गाडीमा कर वृद्धि गरिएको भए पनि यो नयाँ मोडलको गाडी खरिदले उपभोक्तालाई उक्त कर वृद्धिले कुनै असर नपर्ने कम्पनीले जनाएको छ ।

कम्पनीका अनुसार गाडीको बजार मुल्य २६ लाख पन्चानब्बे हजार रहेको छ । नजिकिदै गरेको दशैंको अवसरमा कम्पनीले गाडीको मुल्यमा विशेष छुटको व्यवस्था गरेको छ । जस अनुसार गाडी बुक गर्ने प्रथम सय ग्राहकले २५ लाख ५० हजारमा गाडी पाउने छन् ।

के हो पोलो १.० ? के छन् विशेषता ?

सन् २०११ मा नेपालको बजारमा ल्याएको पोलो १.६ ह्याचब्याक गाडी अत्याधिक सफल र दोस्रो बजारमा पनि सबै भन्दा बढी मूल्य पाउने गाडी रहेको कम्पनीको दावी छ । पोलो १.० ले पनि उपभोक्ताहरूबाट उस्तै माया र सद्भाव पाउने कम्पनीले आशा राखेको छ ।

फक्सवागन पोलो नियमित मर्मत सम्भारमा लाग्ने खर्चको हिसाबमा सबैभन्दा कम खर्चिलो गाडी रहेको कुरा स्वतन्त्र सर्भे गर्ने सँस्था ईलम कन्सल्टेन्सीले प्रमाणित गरेको जानकारी पनि कार्यक्रममा दिइएको थियो ।

अध्ययनले फक्सवागन पोलो गाडी अन्य ब्राण्डका सोहि समूहका गाडी भन्दा ३० प्रतिशत कम खर्च पर्ने देखाएको छ । अध्ययन अनुसार अन्य ब्राण्डका गाडीहरु ५,००० कि.मी. मा सर्भिसिङ गर्नुपर्ने भएपनि फाँक्सवैगन पोलो गाडी १५ हजार कि.मी. सम्म निर्धक्क चलाउन सकिनेछ ।

विशेष छुट सहितको उक्त मोडलको गाडीमा सुरक्षाका विभिन्न व्यवस्था जस्तै एन्टिलक ब्रेकिङ सिस्टम (एबीएस), एयर ब्याग, गाल्भनाइज्ड बडि, पावर विन्डो, रियर भ्यू क्यामेरा, पोलन फिल्टर सहितको एयर कन्डिसन, पावर स्टरिङ आदि समावेश रहेको कार्यक्रममा जानकारी दिइएको छ ।

कार्यक्रममा पूजा इन्टरनेशनल प्रा.लि.का कार्यकारी अधिकृत विवेक विजुक्छेले अन्तर्राष्ट्रिय गाडीकोे व्यापारमा पछिल्ला दुई वर्षमा फक्सवागन अग्र पंक्तिमा रहेको बताए । कम्पनीले सन् २०१७ मा मात्रै १,०४,१३,३१५ गाडी विक्रि गरेको तथ्यांकले पनि यस कुराको पुष्टि गर्ने विजुक्छेको दावी थियो ।

फक्सवागनको नेपालमा हाल ९ वटा सर्भिस स्टेशन रहेको छ,जसमध्ये ३ वटा काठमाडौंमा रहेको छ । कम्पनीले बजारमा ल्याएको उक्त मोडलको गाडी लोकप्रिय हुने कार्यक्रममा बताएको छ ।