चिनीको खुद्रा मूल्य तोकियो, बढीमा विक्रि गरे कारवाही हुने

काठमाडौं– चाडबाडको मुखमा व्यवसायीले चिनीमा मनलाग्दी पैसा असुल्न थालेपछि सरकारले प्रतिकिलो ७० रुपैयाँ खुद्रा मूल्य तोकेर बढीमा बिक्री गर्नेलाई कारबाही गर्ने निर्णय गरेको छ ।

आयातमा बन्देज लगाएको बहानामा व्यापारीले ‘स्टक’ चिनीमा आफूखुसी मूल्य बढाएर एक किलोको ८५ रुपैयाँसम्म लिन थालेका थिए । सरकारले वार्षिक करिब एक लाख टन मात्रै आयात गर्न पाउने निर्णय गर्नुअघि एक किलो चिनीको औसत मूल्य ६५ रुपैयाँ थियो । त्यसयता मूल्य बढाएर ठाउँअनुसार किलोमा १५ देखि २० रुपैयाँ महँगो बनाइएको थियो ।

तत्काल कदम नचाले मूल्य बढेर प्रतिकिलो ९० देखि १०० रुपैयाँसम्म पुग्ने अनुमान गरिएका बेला सरकारले चिनीको खुद्रा मूल्य ७० रुपैयाँ निर्धारण गरेको हो । निर्धारित मूल्यअनुसार विक्रि भइरहेको छ, छैन भन्ने अनुगमन वाणिज्य, आपूर्ति तथा उपभोक्ता संरक्षण विभागले गर्ने छ । विभागले पछिल्लो समय गरेको अनुगमनमा प्रतिकिलो ठाउँअनुसार ७० देखि ८५ रुपैयाँसम्म लिने गरेको पाइएको छ । अब यसरी मनलाग्दो मूल्य लिने व्यापारीलाई कारबाही गरिने सरकारले स्पष्ट पारेको छ ।