तीन प्रदेशको उम्मेदवार मनोनयन असार ४ मा

काठमाडौँ– स्थानीय तहको दोस्रो चरणको निर्वाचनमा सबै दलको सहभागिता सुनिश्चितताका लागि उम्मेदवार मनोनयन दर्ता मिति दुई दिनपछि सारिने भएको छ ।

प्रधानमन्त्री कार्यालय सिंहदरबारमा आज सरकार र निर्वाचन आयोगका पदाधिकारीबीच भएको छलफलमा सरकारको आग्रहपछि दोस्रो चरणमा हुने स्थानीय तहको निर्वाचनको निर्धारित यही असार २ गतेको उम्मेदवार मनोनयन दर्ता मिति असार ४ गते सार्न आयोगले सहमति जनाएको हो ।

मन्त्रिपरिषद्बाट निर्णय भएर आएपछि त्यसबारेमा अघि बढ्ने बैठकपछि प्रमुख निर्वाचन आयुक्त डा अयोधीप्रसाद यादवले बताए । राष्ट्रिय जनता पार्टी नेपालले स्थानीय तहको दोस्रो चरणको निर्वाचनमा सहभागिता जनाउने सङ्केत देखाएपछि सरकारले उम्मेदवार मनोनयन मिति यही असार ४ गते तोक्न आयोगलाई आग्रह गरेको थियो । बैठकमा सरकारले प्रदेश नं २ मा स्थानीय तहको निर्वाचन आगामी असोज २ गते तोक्न गरेको आग्रहका सम्बन्धमा भने आफूहरुको कुनै प्रतिक्रिया नरहेको उनले जानकारी गराए ।

प्रदेश नं ३, ४ र ६ मा स्थानीय तहको निर्वाचन पहिलो चरणमा गत वैशाख ३१ गते सम्पन्न भइसकेको छ भने प्रदेश नं १, ५ र ७ मा यही असार १४ गते हुँदैछ । प्रदेश नं २ मा भने सरकारले राजपाको आग्रहअनुसार स्थानीय तहको निर्वाचन आगामी असोज २ गते तोक्ने निर्णय गरेको छ ।