महिला विश्वकप एशिया छनोट : नेपालले चीनलाई दियो ७८ रनको चुनौति

काठमाडौँ– आईसीसी टी–२० महिला विश्वकप क्रिकेटअन्तर्गत एसिया क्षेत्र छनोटमा नेपालले चीनलाई ७८ रनको चुनौति दिएको छ ।

थाइल्यान्डको बैँककमा टस हारेर ब्याटिङ थालेको नेपालले निर्धारित २० ओभरमा ९ विकेट गुमाउँदै ७७ रन बनायो । नेपालका लागि काजल श्रेष्ठले सर्वाधिक १८ रन बनाइन् । उनले ३२ बलमा एक चौका प्रहार गरिन् । यस्तै सरिता राना मगरले ११ रन बनाउँदा विन्दु रावलले १० रन जोडिन् । अन्यले दोहोरो अंक छुन सकेनन् ।

चीनका लागि हान लिलि र वाङमेङ समान २/२ विकेट लिए । उ जौन, ली हाओइ र लिउ जाईले समान १/१ विकेट हात पारे । चीनलाई पराजित गर्दै नेपाल विश्वकपको ग्लोबल छनोटमा पुग्ने सम्भावनालाई कायमै राख्न चाहन्छ । चीन जारी प्रतियोगितामा निकै बलियो टिमको रुपमा देखा पारेको छ । चीन अहिले अंक तालिकाको तेस्रो स्थानमा रहँदा नेपाल चौथो स्थानमा छ ।

चीनले पाँच खेलबाट तीन खेलमा जित र दुई खेलमा हार ब्यहोर्दै ६ अंक बनाएको छ । नेपालको पनि चार खेलबाट तीन खेलम जित र एक खेलमा हार ब्यहोर्दै ६ अंक नै छ । अंक तालिकाको शीर्ष स्थानमा आयोजक थाइल्यान्ड रहँदा दोस्रो स्थानमा भने यूएई रहेको छ ।

यसअघि भएको पहिलो खेलमा नेपालले मलेसियालाई ३४ रनले पराजित गरेको थियो । त्यस्तै, दोस्रो खेलमा थाइल्यान्डसँग ५७ रनले पराजित हुँदा तेस्रो खेलमा भने नेपालले यूएईलाई सात विकेटले पराजित गर्न सफल भएको थियो । त्यस्तै, चौथो खेलमा नेपालले हङकङलाई चार विकेटले पराजित गरेको थियो ।