निर्मला प्रकरण : पूर्वएसपी दिल्लीराज विष्ट १० लाख धरौटीमा रिहा

काठमाडौं– कञ्चनपुरकी १३ वर्षीया बालिका निर्मला पन्तको घटनाको छानबिनका क्रममा कमजोरी देखिएको भन्दै बर्खास्तीमा परेका प्रहरी कार्यालय कञ्चनपुरका तत्कालीन प्रहरी उपरीक्षक (एसपी) दिल्लीराज विष्टलाई धरौटीमा रिहा भएका छन् । अदालतले एसी विष्टलाई १० लाख धरौटीमा रिहा गर्न आदेश दिएको हो ।

निर्मला हत्या प्रकरणमा प्रमाण नष्ट गरिएको र शंकाष्पद अभियुक्त दिलिपसिंह विष्टलाई यातना दिएको अभियोगमा थुनछेक बहसपछि उनलाई न्यायाधीश डा. राजेन्द्रकुमार आचार्यले धरौटीमा रिहा गर्न आदेश गरेका हुन् ।

‘दिल्लीराज विष्टलाई धरौटीमा रिहाई गर्न आदेश भएको छ’ जिल्ला अदालत कञ्चनपुरका रजिष्टार हरिकृष्ण अवस्थीले भने, ‘साढे १० लाख धरौटी माग भएको छ ।’

२०७५ साउत १० गते हत्या गरिएकी निर्मला पन्तकी आमा दुर्गादेवी पन्तले प्रमण नष्ट विरुद्ध जाहेरी दिएकी थिइन् ।

शंकाष्पद अभियुक्त दिलिपसिंह विष्टका दाजु खड्क सिंहले आफ्नो भाईलाई यातना दिएको भन्दै प्रहरीमा जाहेरी दिएपछि कञ्चनपुर प्रहरीले दिल्लीराज विष्ट सहितका प्रहरी अधिकारीमाथि अनुसन्धान गरेर सरकारी वकिल कार्यालय मार्फत अदालतमा मुद्धा दर्ता गरेको थियो ।