देश र जनताकाे सेवाकर्ममा तीन दशक जीवन दिएका एआईजी दाहाल अन्याय बिरूद्द न्यायकाे खाेजीमा

काठमाडौं- देश र जनताकाे सेवाकर्ममा तीन दशक जीवन दिएका सशस्त्र प्रहरी बलका एआईजीपी वंशी राज दाहालले सेवाबाट बर्खास्त भएपछि कानुनी उपचार खोज्न परामर्श सुरु गरेका छन्।

गृह मन्त्रालयले असोज २३ गतेदेखि लागू हुने गरी विभागीय कारबाहीमार्फत दाहाललाई सेवाबाट बर्खास्त गरेको थियो। उनीमाथि संवेदनशील सूचना चुहावट गरी संगठनको आचरणविपरीत काम गरेको आरोप लगाइएको छ। यसअघि सरकारले असोज १९ गते उनलाई निलम्बन गरेको थियो।

बर्खास्तीसम्बन्धी सूचनामा कुन संवेदनशील सूचना चुहावट भएको हो भन्ने विषय स्पष्ट रूपमा खुलाइएको छैन। सशस्त्र प्रहरी बलको सीमा विभाग प्रमुखका रूपमा कार्यरत दाहाल अवकाशमा जान केही दिन मात्रै बाँकी रहँदा बर्खास्तीमा परेका थिए।

समाचारअनुसार, पूर्वप्रधानन्यायाधीश चोलेन्द्रशमशेर जबरासँग प्रहरी कार्यालयमा भएको भेट र इनम सापकोटासँगको सम्पर्कका विषय पनि अनुसन्धानका क्रममा चर्चामा आएका थिए। प्रधानमन्त्री बालेन्द्र शाहका गतिविधिसम्बन्धी संवेदनशील सूचना आदानप्रदान भएको दाबीसमेत सार्वजनिक भएको छ। यद्यपि, यी विषयमा सम्बन्धित निकायबाट विस्तृत आधिकारिक विवरण सार्वजनिक भएको छैन।

लामो समय सुरक्षा संगठनमा रहेर जिम्मेवारी निर्वाह गरेका दाहालले बर्खास्तीको निर्णयविरुद्ध अब कस्तो कानुनी कदम चाल्छन् भन्ने विषय चासोको रूपमा हेरिएको छ। उनले कानुनी परामर्श सुरु गरेसँगै बर्खास्तीको निर्णयलाई कानुनी प्रक्रियाबाट चुनौती दिने सम्भावनाबारे चर्चा सुरु भएको छ।