महायोगी सिद्धबाबा : धर्म, सत्य र न्यायको प्रतीक

काठमाडौँ – जगद्गुरु श्रीरामानन्दाचार्य स्वामी रामकृष्णाचार्य, जो महायोगी सिद्धबाबाका रूपमा परिचित छन्, हालसालै महिला अनुयायीमाथि जबरजस्ती करणीको आरोपबाट उच्च अदालत विराटनगरले सफाइ दिएको छ। जिल्ला अदालत सुनसरीको निर्णयलाई सदर गर्दै, उच्च अदालत विराटनगरको संयुक्त इजलासले ‘अभियोग दाबी नपुगेको’ ठहर गर्दै महायोगी सिद्धबाबालाई निर्दोष घोषित गरेको हो। यो घटना न केवल एउटा साधु सन्तप्रतिको आरोपको अन्त्य हो, अपितु धर्म र न्यायको एक महत्वपूर्ण विजय पनि हो।

महायोगी सिद्धबाबाको योगदान

महायोगी सिद्धबाबा नेपालको वैदिक सनातन धर्मको संरक्षण र प्रवर्द्धनमा समर्पित महापुरुष हुन्। उनले धर्म, संस्कृति, र संस्कारलाई निरन्तरता दिनका लागि अनगिन्ती प्रयासहरू गरेका छन्। महायोग, आयुर्वेद, ज्योतिष विज्ञान, र नाडी विज्ञानमा उनको अद्भुत ज्ञानले धेरैलाई प्रभावित गरेको छ। विशेष गरी हिमालय क्षेत्रदेखि मरुभूमिसम्म तपस्या गर्दै, उनले सुरत-शब्दयोगको गूढतम ज्ञान प्राप्त गरेका छन् ।

उनको विशेषता भनेको कुण्डलिनी शक्तिको जागरण हो, जसलाई उनले स्पर्श, दृष्टि, मन्त्र वा सङ्कल्प मात्रले जागृत गराउन सक्छन्। यस्तो क्षमता साधनाले मात्र संभव हुन्छ, जसको लागि उनले जीवनभर कठोर तपस्या गरेका छन्।

धर्ममाथिको षड्यन्त्र

महायोगी सिद्धबाबामाथि लगाइएका जबरजस्ती करणीका आरोपहरू कुनै साधारण आरोप थिएनन्। यो सुनियोजित षड्यन्त्र थियो, जसको उद्देश्य वैदिक सनातन धर्मलाई कमजोर बनाएका थिए । यस्ता षड्यन्त्रहरू सधैँ धर्मका रक्षकहरूलाई बदनाम गरेर धर्मको जरो उखल्ने खेलको हिस्सा हुन्। इतिहासले देखाएको छ कि जब जब सच्चा सन्तहरूलाई निशाना बनाइएको छ, तब त्यसको परिणाम धार्मिक समाजलाई नै गहिरो चोट पुगेको हुन्छ।

तर सत्यमेव जयते, सत्यको सधैं विजय हुन्छ। उच्च अदालतको यो निर्णयले न केवल महायोगी सिद्धबाबालाई न्याय दिलाएको छ, तर सम्पूर्ण वैदिक सनातन हिन्दू धर्मको गरिमा पनि बचाएको छ। उच्च अदालत निर्णयले सत्यको सधैं विजय हुन्छ कुरा पुनः सिद्ध भएको छ ।

महायोगी सिद्धबाबाको कार्य

महायोगी सिद्धबाबाको नेतृत्वमा धेरै महत्वपूर्ण कार्यहरू सम्पन्न भएका छन्। उनले नेपाल र भारतमा धार्मिक र सामाजिक सुधारका अभियानहरू सञ्चालन गरेका छन् । उनको नेतृत्वमा आयोजित श्रीराम तारक ब्रह्म महायज्ञ, श्रीरामार्चन महायज्ञ, र संकटमोचन श्रीहनुमद् महायज्ञले वैदिक धर्मलाई पुनः जागृत गराउन महत्त्वपूर्ण भूमिका खेलेका छन्।

साथै, उनले स्वास्थ्य, शिक्षा, र समृद्धिका क्षेत्रमा पनि अनगिन्ती योगदान दिएका छन् । महायोगी सिद्धबाबाको नेतृत्वमा जगद्गुरु श्रीरामानन्दाचार्य सेवा पीठले विभिन्न आपतकालीन स्थितिमा निःशुल्क भोजन शिविर, राहत कोष, र कोभिड–१९ महामारीको बेलामा होल्डिंग सेन्टरको स्थापना जस्ता महत्त्वपूर्ण कार्यहरू गरेको छ।

धर्मगुरुहरूसँगको अपिल

महायोगी सिद्धबाबामाथि भएको षड्यन्त्रले सम्पूर्ण हिन्दू धर्मगुरुहरू र धार्मिक अभियन्ताहरूलाई एकजुट हुन आवश्यक रहेको स्पष्ट पार्छ। उनी जस्तो त्यागी महापुरुषलाई पनि षड्यन्त्रको शिकार बनाउने प्रयास भएको छ भने, अन्य साधु–सन्तहरू र धर्मगुरुहरू पनि यसबाट अछुतो रहन सक्दैनन्।

हिन्दू धर्ममा एकताको आवश्यकता आज भन्दा महत्वपूर्ण कहिले पनि भएको थिएन। अन्य धर्महरूमा आफ्ना धर्मगुरुहरूलाई बचाउन समुदायको बलियो प्रतिवाद देख्न पाइन्छ, तर हिन्दू धर्ममा भने यस्तो एकता प्रायः अभावमा देखिन्छ। समय छ, सोच्नुपर्ने कुरा छ कि हिन्दू धर्मको रक्षा गर्न हामी सबैले एकजुट भएर काम गर्नुपर्ने बेला आएको छ।

महायोगी सिद्धबाबाको चरित्रमाथि भएको आक्रमण केवल उनको मात्र अपमान होइन, यो सम्पूर्ण वैदिक सनातन धर्ममाथि गरिएको आक्रमण हो। उच्च अदालतले दिएको निर्णयले सत्यको जीत भएको छ, तर हिन्दू धर्मगुरुहरू र अभियन्ताहरूले यसबाट सिकेर आफ्नो धर्मको संरक्षण र प्रचारमा अझ सक्रिय भूमिका निर्वाह गर्नुपर्नेछ।

महायोगी सिद्धबाबा आज पनि धर्म, सत्य, र न्यायको प्रतीक बनेर हामी सबैको प्रेरणाको स्रोत रहेका छन्। सत्यलाई कुनै षड्यन्त्रले दबाउन सक्दैन, र महायोगी सिद्धबाबाको जीवन र कार्यले यो तथ्यलाई पुनः स्थापित गरेको छ।

सत्यमेव जयते।