एमालेसंगको एकताको च्याप्टर ‘क्लोज’ भइसकेको छैन : वामदेव गौतम

काठमाडौँ – कम्युनिष्ट पार्टी एकता राष्ट्रिय अभियानका संयोजक वामदेव गौतमले एमालेसंगको एकताको ‘च्याप्टर क्लोज’ भइनसकेको बताएका छन् ।

शुक्रबार संसद भवनमा सञ्चारकर्मीसंग कुरा गर्दै गौतमले एमाले अध्यक्ष केपी ओलीले बोलाए आफु वार्ता गर्न जाने भन्दै एकताको च्याप्टर क्लोज भइनसकेको बताएका हुन् । एमाले केन्द्रीय कमिटीले निर्णय गरेर एकता गर्ने निर्णय गरे आफू एमालेमा जाने उनले बताए । त्यसका लागि सम्मानजनक जिम्मेवारी दिनुपर्ने उनको भनाइ छ ।

उनले नेपालको कम्युनिष्ट पार्टीहरुलाई एकता गर्ने आफ्नो अभियानलाई निरन्तर अघि बढाउने उल्लेख गरे । आफ्नो अभियानमा रहेका सदस्यहरुले एमालेमा समाहित हुन इच्छा देखाएकाले आफूले त्यही अनुसार छलफलमात्रै गरेको उनले बताए ।

गौतमले केही समयअघि माधव नेपालसंग पनि केही छलफल भएको तर एकताका बारे भने कुनै निर्णय नभएको जानकारी दिए ।