नेपाली कम्युनिष्ट पार्टी र भीम रावलको मातृभूमि जागरण अभियानबीच एकता

काठमाडौँ – नेपाली कम्युनिष्ट पार्टी र डा भीम रावल नेतृत्वको मातृभूमि जागरण अभियान, नेपालका बीच पार्टी समायोजन भएको छ ।

बुधबार काठमाडौंको राष्ट्रियसभा गृहमा आयोजित एक कार्यक्रमकाबीच दुई पार्टीबीच समायोजनको घोषणा भएको हो । कार्यक्रममा नेपाली कम्युनिष्ट पार्टीका संयोजक पुष्पकमल दाहाल प्रचण्ड र सहसंयोजक माधव कुमार नेपालले मातृभूमि जागरण अभियान, नेपालका संयोजक भीम रावललगायतका नेताहरुलाई पार्टीमा स्वागत गरेका थिए ।

यसअघि बुधबार नै दुई पार्टीबीच सात बुँदे सहमति भएको थियो । सहमति अनुसार आगामी ६ महिनाभित्र एकता राष्ट्रिय महाधिवेशन गर्ने र महाधिवेशनको मिति तथा स्थान सचिवालयले छिट्टै निर्धारण गरिने उल्लेख रहेको नेपाली कम्युनिष्ट पार्टीका नेता प्रकाश ज्वालाले जानकारी दिए ।

त्यस्तै महाधिवेशनमार्फत एकीकृत पार्टीको संरचना, नीति तथा नेतृत्वलाई संस्थागत गरिने, राष्ट्रिय सार्वभौमिकता, एकता, स्वाधीनता, अखण्डता र आत्मनिर्णयको अधिकारको संरक्षण गर्ने प्रतिबद्धता व्यक्त गरिएको ज्वालाले बताए ।

त्यसैगरि समाजवाद र सामाजिक न्यायमा आधारित आर्थिक–सामाजिक रुपान्तरण र समृद्धिको अभियानलाई संयुक्त रूपमा अघि बढाउने सहमति दुई पार्टीबीच भएको छ भने मातृभूमि जागरण अभियान अन्तर्गतका सबै तहका कार्यकर्ताहरूलाई नेपाली कम्युनिस्ट पार्टीको सोही तहमा पारस्परिक सहमतिमा समायोजन गरिने उल्लेख छ ।