सांसदलाई रविको निर्देशन : संसद चलेको समय बाहेकका दिनमा आफ्नो निर्वाचन क्षेत्रमा खटिनूस्

काठमाडौँ – राष्ट्रिय स्वतन्त्र पार्टी (रास्वपा)का सभापति रवि लामिछानेले जनताले दिएको अभिमतको पूर्णसम्मान गर्दै सकारात्मक परिवर्तनका पक्षमा लाग्न नवनिर्वाचित प्रतिनिधिसभा सदस्यलाई निर्देशन दिनुभएको छ ।

बुधबार ललितपुरमा नवनिर्वाचित प्रतिनिधिसभा सदस्यका लागि आयोजना गरेको अभिमुखीकरण कार्यक्रमलाई सम्बोधन गर्दै सभापति लामिछानेले जनताले ठूलो आशा र भरोसा गरेर रास्वपालाई खन्याएर मत दिएको भन्दै अभिमतको पूर्णसम्मान गर्दै सकारात्मक परिवर्तनका पक्षमा लाग्न निर्देशन दिएका हुन् ।

उनले नागरिकसँग गरेका करारपत्रलाई राम्रोसँग पढ्न सुझाव समेत दिए । सभापति लामिछानेले सार्वजनिक रूपमा जथाभावी अभिव्यक्ति दिने र प्राप्त अभिमतलाई मनोरञ्जनका रूपमा लिने छुट कसैलाई नरहेको उल्लेख गरे ।

अर्थतन्त्र लगायत देशका कयौं गहन बिषयमा गरिने हल्का टिप्पणीले रास्वपाप्रतिको आशा निराशामा बदलिन सक्ने भएकाले सचेत रहन उनले आग्रह गरे । सभापति लामिछानेले संसद चले बाहेकको दिनमा आफ्नो निर्वाचन क्षेत्रमा खटिन र जनताको समस्या बुझ्न निर्देश गए । उनले मन्त्री बनाउन र मन्त्री बन्नका लागि मिडिया ट्रायल नगर्न समेत चेतावनी दिए । अहिलेसम्म मन्त्रीका विषयमा पार्टीभित्र कुनै छलफल र निर्णय नभएको उनले बताए ।

रास्वपाका समर्थक प्रायः अराजक र असहिष्णु छन् भन्न टिप्पणी हुने गरेको भन्दै सभापति लामिछानेले सामाजिक सञ्जालमा गाली गलौज गर्ने काम नगर्न समेत निर्देशन दिए । उनले अहिले रास्वपाले नभइ देशले जितको प्रमाणित गर्नुपर्ने भएकाले सुशासनमा नयाँ मानक स्थापनाका साथै मुलुकलाई आर्थिक समृद्धिको बाटोमा अघि बढाउन अहोरात्र काम गर्ने स्पष्ट पारे ।