नेपाल–भारत भूमि समस्याबारे प्रधानमन्त्रीको अभिव्यक्ति निन्दनीय र आपत्तिजनक छ : काँग्रेस सभापति थापा

नेपाली काँग्रेसका सभापति गगनकुमार थापाले नेपाल–भारत भूमि समस्याबारे प्रधानमन्त्रीको अभिव्यक्ति निन्दनीय र आपत्तिजनक रहेको बताएका छन् ।

नेपाली काँग्रेस नीति, अनुसन्धान तथा प्रशिक्षण प्रतिष्ठानले सोमबार रुपन्देहीमा आयोजना गरेको लुम्बिनी प्रदेशस्तरिय परामर्श कार्यशाला उद्घाटन गर्दै सभापति थापाले नेपालको भौगोलिक अखण्डता र नेपालको राष्ट्रिय सुरक्षासँग जोडिएको संवेदनशील विषयमा प्रधानमन्त्रीले राखेको अभिव्यक्ति निन्दनीय र आपत्तिजनक रहेको बताएका छन् । सीमासम्बन्धी गैरजिम्मेवार अभिव्यक्ति फिर्ता लिइ प्रधानमन्त्रीले सदनमा माफी माग्नुपर्ने उनको भनाइ छ ।

त्यस्तै सभापति थापाले जेन्जी आन्दोलसम्बन्धी मानवअधिकार आयोगको प्रतिवदेन कार्यान्वयन गर्न माग गर्दै दोषि देखिएकाहरुलाई निष्पक्ष ढंगले कारवाही गर्नुपर्नेमा जोड दिएका छन्। संसदमा संख्याको दम्भ देखिएको भन्दै उनले जनमतलाई अवसरको रुपमा लिएर काम गर्न रास्वपालाई सुझाव दिएका छन् ।

सभापति थापाले पार्टीलाई एकताबद्ध बनाएर अघि लैजान आफु गम्भीर रुपमा लागेको उल्लेख गरेका छन् ।उनले निर्वाचनले कांग्रेस ल्याएको नभइ कांग्रेसका कारण निर्वाचन भएको इतिहास रहेको भन्दै निर्वाचनको परिणामलाई स्वभाविक रुपमा लिन आग्रह गरेका छन्।

त्यस्तै कांग्रेस उपसभापति विश्वप्रकाश शर्माले सीमाका बारेमा प्रधानमन्त्रीले सदनमा राखेको अभिव्यक्तिप्रति बिमति रहेको जनाएका छन् । सांसदलाई भ्रष्टाचार लगाएत गम्भीर फौजदारी कसुरमा उन्मुक्ति दिने व्यवस्थाप्रति उनले आपत्ति जनाएका हुन् । उनले कांग्रेस बलियो बन्न नसकेकाले मुलुकको राष्ट्रियमाथि गम्भीर प्रश्न उठ्न थालेको धारणा व्यक्त गरेका छन्।

उपभापति शर्माले पार्टीलाई सुदृढ बनाउन आवश्यक रहेको बताउँदै सबैले सबैलाई विश्वास गर्ने बातावरण बनाउन आवश्यक रहेकोमा जोड दिएका छन् ।