काठमाडौं – सर्लाहीको गोडैता नगरपालिका–१०, सिसौटियाका ३५ वर्षीय विवेक मण्डलको आत्मदाह प्रयासपछि उपचारका क्रममा आज बिहान निधन भएको छ। गम्भीर अवस्थामा रहेका मण्डलको काठमाडौंस्थित कीर्तिपुर बर्न अस्पतालमा उपचार भइरहेको थियो। चिकित्सकहरूको निरन्तर प्रयासका बाबजुद उनको ज्यान बचाउन नसकिएको हो।
ADVERTISEMENT
विवेक मण्डलको निधनपछि देशभरबाट शोक व्यक्त भइरहेको छ। यसैबीच नेपाली कांग्रेसका सभापति गगनकुमार थापाले सामाजिक सञ्जाल फेसबुकमार्फत श्रद्धाञ्जली व्यक्त गर्दै मण्डलका सन्तानहरूको शिक्षा–दीक्षाको सम्पूर्ण जिम्मेवारी आफूले लिने घोषणा गरेका छन्।
ADVERTISEMENT
थापाले आफ्नो फेसबुक पोस्टमा मण्डलको असामयिक निधनप्रति गहिरो दुःख व्यक्त गर्दै पीडित परिवारप्रति समवेदना प्रकट गरेका छन्। साथै उनले मण्डलका बालबालिकाको शिक्षा कुनै कारणले प्रभावित हुन नदिने प्रतिबद्धता व्यक्त गर्दै उनीहरूको अध्ययनका लागि आवश्यक सहयोग व्यक्तिगत रूपमा गर्ने बताएका छन्।
विवेक मण्डलले केही दिनअघि आत्मदाहको प्रयास गरेका थिए। गम्भीर अवस्थामा उनलाई तत्काल उपचारका लागि काठमाडौं ल्याइएको थियो। शरीरको ठूलो भाग जलेका कारण उनको अवस्था लगातार जटिल बन्दै गएको थियो र अन्ततः आज बिहान उपचारकै क्रममा उनको निधन भएको हो।
मण्डलको निधनसँगै आत्मदाहका घटनाको कारण, नागरिकका गुनासा र राज्यको जवाफदेहिताबारे पुनः सार्वजनिक बहस सुरु भएको छ। विभिन्न राजनीतिक दलका नेता, सामाजिक अभियन्ता तथा सर्वसाधारणले घटनाप्रति दुःख व्यक्त गर्दै यस्ता घटना दोहोरिन नदिन प्रभावकारी पहल गर्न सरकारसँग आग्रह गरेका छन्।
गगन थापाले मण्डलका सन्तानको शिक्षा–दीक्षाको जिम्मेवारी लिने घोषणा गरेपछि सामाजिक सञ्जालमा त्यसको व्यापक चर्चा भइरहेको छ। धेरैले यसलाई मानवीय र जिम्मेवार पहलका रूपमा टिप्पणी गरेका छन् भने शोकाकुल परिवारलाई यसले केही राहत पुग्ने विश्वास व्यक्त गरेका छन्।
