विपद व्यवस्थापनका लागि कांग्रेसको रणनीतिक परिचालन टोली गठन

काठमाडौं – नेपाली काग्रेसले विपद व्यवस्थापनका लागि रणनीतिक परिचालन टोली गठन गरेको छ ।

पार्टी कार्यालय सानेपामा तीन दिनसम्म चलेको पूर्वतयारी र प्रतिकार्य प्रशिक्षणको समापनका अवसरमा उपसभापति विश्वप्रकाश शर्माले रणनीतिक परिचालन टोली गठनको घोषणा गरेको हो । टोलीमा प्रशिक्षणमा सहभागी ४० युवा रहेका छन् ।

केन्द्रीय नीति, अनुसन्धान तथा प्रशिक्षण प्रतिष्ठानले आयोजना गरेको कार्यक्रमको समापन गर्दै प्रतिष्ठान प्रमुख तथा पार्टी उपसभापति शर्माले यो तीन दिनको अवधिलाई शुरुवात मानेर विपदमा परेका मानिसको जीवन बचाउन अबको लामो यात्रा प्रारम्भ भएको मानेर काम गर्न सहभागीहरुलाई आग्रह गरे । नेपाली कांग्रेस पार्टीले देशभर यस्ता एक हजार जनशक्ति उत्पादन गर्ने लक्ष्य राखेको पनि उनले जानकारी दिए ।

कांग्रेस समाज र राष्ट्रलाई जिताउन, विपद्मा परेकाहरूलाई सहयोग गर्न प्रतिबद्ध रहेको उनको भनाइ छ । प्रशिक्षणमा संयुक्त राष्ट्र संघ तथा अन्तर्राष्ट्रिय रेडक्रसमा काम गरेका बिज्ञहरुले प्रशिक्षण दिएका थिए ।