काठमाडौं – नेपाली कांग्रेसका सभापति गगन थापाले वर्तमान सरकारको कार्यशैलीप्रति नागरिकमा अनिश्चितता, हतास र आक्रोश बढ्दै गएको बताएका छन्।
ADVERTISEMENT
उनले पछिल्लो समय नागरिकमा देखिएको असन्तुष्टिलाई राजनीतिक दलहरूले गम्भीर रूपमा लिनुपर्ने बताएका हुन्। थापाका अनुसार जनताको आक्रोशलाई आफ्नो पक्षमा देखिएको राजनीतिक लाभका रूपमा मात्र बुझ्नु गलत हुनेछ।
ADVERTISEMENT
सभापति थापाले नागरिकमा देखिएको आक्रोश कांग्रेसका लागि समेत खुसीको विषय नभएको स्पष्ट पारे। ‘नागरिकको आक्रोश कांग्रेसका लागि खुसी होइन, चिन्ताको विषय हो’ भन्दै उनले पार्टीले पनि आफ्नो भूमिका र कार्यशैलीबारे गम्भीर समीक्षा गर्नुपर्ने धारणा राखेका छन्।
थापाले फागुन २१ गतेको मत परिणामलाई जनतामा सञ्चित रहेको आक्रोश र असन्तुष्टिको अभिव्यक्तिका रूपमा व्याख्या गरेका छन्। उनका अनुसार लामो समयदेखि नागरिकमा जम्मा हुँदै आएको असन्तुष्टि निर्वाचनका क्रममा एकमुष्ट रूपमा प्रकट भएको हो।
उनले जनताको भावना र अपेक्षालाई बेवास्ता गर्दै अघि बढे आगामी दिनमा राजनीतिक दलप्रति अझ ठूलो असन्तुष्टि पैदा हुन सक्ने चेतावनीसमेत दिएका छन्।
थापाले सरकार र राजनीतिक दलहरूले नागरिकको गुनासो सुन्ने, कमजोरी सच्याउने र जनविश्वास कायम गर्ने दिशामा काम गर्नुपर्नेमा जोड दिए। जनतामा बढिरहेको निराशा र आक्रोशलाई समयमै सम्बोधन गर्नु अहिलेको प्रमुख आवश्यकता भएको उनको भनाइ छ।
