सिन्धुपाल्चोक- नेपाली कांग्रेसको १५औँ महाधिवेशनअन्तर्गत चौतारा साँगाचोकगढी नगरपालिका नगर सभापति पदमा विकास थापाले उम्मेदवारी दिने भएका छन्। पार्टी संगठनलाई थप बलियो, सशक्त र जनमुखी बनाउने उद्देश्यसहित थापा नगर सभापतिको दौडमा अघि बढेका हुन्।
ADVERTISEMENT
नगरभित्र नेपाली कांग्रेसको संगठनलाई थप व्यवस्थित र प्रभावकारी बनाउँदै कार्यकर्ताबीच आपसी एकता, सहकार्य र समन्वयलाई प्राथमिकतामा राख्ने उद्देश्यले आफूले उम्मेदवारी दिन लागेको थापाले बताएका छन्। उनले पार्टी संगठनको आधारका रूपमा रहेका कार्यकर्ताको भावना, सुझाव र विश्वासलाई सम्मान गर्दै सबैलाई समेटेर अघि बढ्ने प्रतिबद्धता व्यक्त गरेका छन्।
ADVERTISEMENT
चौतारा साँगाचोकगढी नगरपालिकामा नेपाली कांग्रेसलाई थप मजबुत बनाउन संगठनको सक्रियता बढाउने, पार्टीका नेता तथा कार्यकर्ताबीचको सम्बन्धलाई अझ सुदृढ बनाउने र जनतासँग पार्टीको प्रत्यक्ष सम्बन्धलाई प्रभावकारी बनाउने विषयलाई आफ्नो प्राथमिकतामा राखेको थापाको भनाइ छ।
व्यक्तिगत स्वार्थभन्दा माथि उठेर संगठनको हित, पार्टीको एकता र आगामी पुस्ताको राजनीतिक भविष्यलाई केन्द्रमा राखेर काम गर्ने लक्ष्यसहित आफू सभापति पदमा उम्मेदवारी दिन लागेको उनले बताएका छन्। पार्टीभित्र रहेका विभिन्न विचार र धारालाई समेट्दै साझा उद्देश्यका साथ अघि बढ्नुपर्नेमा समेत उनले जोड दिएका छन्।
थापाको उम्मेदवारीसँगै चौतारा साँगाचोकगढी नगरपालिकाको कांग्रेस संगठनमा नयाँ नेतृत्व, युवा ऊर्जा, एकता र संगठन सुदृढीकरणको विषयले चर्चा पाएको छ। नगर सभापतिको जिम्मेवारी पाएमा कार्यकर्ताको भावना र पार्टीको हितलाई केन्द्रमा राखेर संगठन निर्माणमा सक्रिय भूमिका निर्वाह गर्ने उनको प्रतिबद्धता छ।
“एकता हाम्रो शक्ति हो, संगठन हाम्रो आधार हो” भन्ने भावनासहित थापा नगर सभापति पदमा अघि बढेका छन्। आगामी अधिवेशनबाट नयाँ नेतृत्व चयन हुँदै गर्दा उनको उम्मेदवारीलाई संगठनभित्रको नेतृत्व परिवर्तन र नयाँ ऊर्जासँग जोडेर हेरिएको छ।
