रुकुम पश्‍चिमको खलंगामा आगलागी, तीन पसलमा क्षति

रुकुम पश्‍चिम — जिल्ला सदरमुकाम खलंगाको मुख्य बजारका पसलमा आगलागी भएको छ । मुसीकोट नगरपालिका–१, खलंगाको जिप्रका लाइनका तीन पसलमा आगलागीबाट पूर्ण रुपमा क्षति पुगेको हाे । बुधबार राति पौने ११ बजे सुरु भएको आगलागी बिहीबार बिहान २ बजे मात्रै नियन्त्रणमा आएको थियो ।

लक्ष्मी पुनको घरमा रहेका साइकुमारी स्टेसनरी, आमा कपडा पसल र वीरबहादुर रावलको घरमा रहेको हिमालय फेन्सी पसलमा आगलागी भएको छ। आमा कपडा पसलबाट आगो सुरु भएको बताइएको छ। आगलागीबाट तीन वटै पसलको सम्पूर्ण सामग्री जलेको छ भने घरमा समेत क्षति पुगेको छ। आगो किन र कसरी लाग्यो भन्ने केही खुलेको छैन।

प्रहरीले तीन पसलमा भएको आगलागीबाट करिब ४० लाख क्षति भएको जनाएको छ। जिल्ला प्रहरी प्रमुख प्रहरी नायब उपरीक्षक ठगबहादुर केसीका अनुसार प्रारम्भिक अनुसन्धानबाट ४० लाख बराबरको क्षति भएको र विस्तृत विवरण आउँन बाँकी छ।