काठमाडौँ – नेपाल र चीनबीचको रसुवागढी–केरुङ नाका बुधबारदेखि अन्तर्राष्ट्रिय नाकामा स्तरोन्नति गरिएको छ । अन्तर्राष्ट्रिय नाकाको रुपमा रुपान्तरण भए पश्चात अब रसुवागढी-केरुङ नाकाबाट नेपाली र चीनियाँ नागरिकका साथसाथै तेश्रो मुलुकका नागरिकहरु समेत आवतजावत गर्न सक्ने भएका छन् ।
ADVERTISEMENT
नेपाल र चीनको तिब्बत स्वशासित क्षेत्रबीच रहेको रसुवागढी–केरुङ नाका बि. सं. २०७१ मंसिर १५ देखि द्विपक्षीय नाकाको रुपमा संचालन हुँदै आएको थियो । उक्त नाकाबाट नेपाली र चीनियाँ नागरिकहरु वैधानिक राहदानी र भिसा लिएर एक अर्काका मुलुकमा आवत जावत गर्न सक्ने अवस्था थियो । यस नाकालाई अन्तर्राष्ट्रिय नाका बनाउनका लागि सन् २०१७ को जुन महिनामा नेपाल र चीनका परराष्ट्र मन्त्रालयहरुबीच कूटनीतिक पत्र आदान प्रदान भएको थियो ।
ADVERTISEMENT
उक्त नाका अन्तर्राष्ट्रिय नाकाको रुपमा संचालन भएको घोषणासहित पत्रकारहरुलाई जानकारी गराउन चीनको तिब्बत स्वशासित क्षेत्र सरकारले ल्हासास्थित नेपाली महावाणिज्यदूत गोविन्द बहादुर कार्कीको उपस्थितिमा ल्हासामा एक पत्रकार सम्मेलनको आयोजना गरेको थियो ।
उक्त पत्रकार सम्मेलनमा तिब्बत सरकारका तर्फबाट बोल्दै तिब्बत सरकारका सहायक अध्यक्ष लुओ मेइले ल्हासास्थित रसुवागढी-केरुङ नाकालाई अन्तर्राष्ट्रिय नाकाको रुपमा घोषणा गर्न पाउँदा खुसी लागेको बताइन् । साथै, उनले चीनतर्फ उक्त नाकाको भौतिक पुर्वाधार पुनर्निर्माण तथा स्तरोन्नतिको कार्य लगभग पूरा भएको र यो नाकालाई अन्तर्राष्ट्रिय नाकामा रुपान्तरण गरेबाट दुई देशबीचको व्यापार, पर्यटन तथा जनस्तरको सम्पर्कमा अभिबृद्धि हुने तथा यसबाट चीनको वान बेल्ट वान रोड कार्यान्वयनमा समेत सहयोग पुग्ने बताइन् ।
उक्त पत्रकार सम्मेलनमा ल्हासास्थित नेपाली महावाणिज्यदूत गोविन्द बहादुर कार्कीले मन्तव्य राख्दै रसुवागढी-केरुङ नाकालाई अन्तर्राष्ट्रिय स्तरको बनाइएबाट दुई देशबीचको व्यापार, पर्यटन, लगानी तथा जनस्तरको सम्बन्ध अझ बढ्ने कुरा बताए ।
