काठमाडौँ – भारतीय राजदूतावास, काठमाडौंले नेपाल उद्योग वाणिज्य महासंघ र नेपाल फ्रान्चाइज डट कमसँगको सहकार्यमा नेपाल भारत लगानी सम्मेलन आयोजना गर्ने भएको छ । अशोज ३० गतेदेखि कात्तिक २ गतेसम्म काठमाडौँमा हुने उक्त सम्मेलन नेपाल भारत वाणिज्य एक्सपोको दोस्रो संस्करण हो ।
यसै कार्यक्रमका लागि विशेष रुपले तयार पारिएको थ्रीडी टेक्नोलोजी सहितको भर्चुअल प्लेटफर्म मार्फत सम्मेलनको आयोजना गरिदैछ । भारत र नेपालको अर्थ बजारमा तीव्र रुपले स्टार्टअप व्यापार व्यवसाय बढिरहेको छ । यस सम्मेलनमार्फत नयाँ उद्यमीहरुले आफ्नो व्यापार व्यवसायलाई व्यवसायका लागि प्रेरित गर्ने र कार्यक्रमबाट दुबै देशका ब्राण्ड तथा फ्रान्चाइजहरुले प्रचुर मात्रामा लाभ उठाउन सक्ने आयोजकले बताएको छ।
साथै यस्ता कार्यक्रमले नव उद्यमीहरुलाई घरेलु अर्थतन्त्रमा सफलता हासिल गरेका ब्राण्डहरुसँग मिलेर कसरी आफ्नो ब्राण्डलाई अगाडि ल्याउनेबारे बुझ्न मद्दत गर्दछ । यस पटकको दोस्रो संस्करणको सम्मेलनले भारतका प्रतिष्ठित ब्राण्डलाई नेपालमा ल्याउन र नेपालका ब्राण्डलाई भारतमा पुर्याउन मद्दत गर्ने भारतीय राजदूताबासले जनाएको छ । दूतावासकाअनुसार एक अर्काको अर्थतन्त्रमा यस्ता ब्राण्डहरुको प्रवेशले लगानी भित्राउने मात्र नभई प्रविधि तथा व्यवहारिक ज्ञानको आदानप्रदानलाई समेत प्रेरित गर्नेछ ।
यसअघि २०१९ मा यस कार्यक्रमले राम्रो प्रतिक्रिया पाएको थियो । सम्मेलनमा भारतका ७० तथा नेपालका २० वटा अग्रणी ब्राण्डहरुको सहभागीता थियो । नेपालका दुई हजार भन्दा बढी उद्यमीहरुको सहभागीता रहेको उक्त सम्मेलनले यी ब्राण्डहरुसँग सहकार्य तथा व्यापार विस्तार गर्ने अवसर प्रदान गरेको थियो । सो सम्मेलनमा ५० भन्दा धेरै व्यापार साझेदारी सहकार्य सम्पन्न भएको थियो ।