जनताको अधिकार खोसेर सर्वोच्चले जात्रा देखायो, माधवलाई पार्टीमा कुनै स्थान छैन : ओली

काठमाडौँ – निवर्तमान प्रधानमन्त्री केपी शर्मा ओलीले नेकपा (एमाले)मा माधवकुमार नेपालले आत्मालोचना समेत गर्ने कुनै स्थान नभएको बताएका छन् । प्रधानमन्त्रीबाट पदमुक्त भएपछि बुधबार आफ्नो निजी निवास बालकोट फर्किएका ओलीले पार्टीमा माधव नेपालको हकमा अत्मालोचना गर्ने कुनै ठाउँ नै नरहेको बताएका हुन् ।

अरुको पछाडि लाग्नेहरुको सन्दर्भमा कमी कमजोरी महसुस गरेर पार्टीमा आएर काम गर्न आए मौका दिने तर माधव नेपालको हकमा आत्मालोचना, गल्ती कमजोरी स्वीकार नगरिने धारणा रारे । उनले आफूलाई जालझेल गरेर हटाइएको भन्दै त्यसको अगुवाइ माधव नेपाल गरेको आरोप लगाए ।

‘माधव नेपालजस्ता लाज सरम हराएका मान्छेहरुका पछाडि लाग्ने केही व्यक्तिहरुले कमी कमजोरी महसुस गरेर पार्टीमा आत्मालोचना गर्दै आए भने उहाँहरुलाई हामी काम गर्ने मौका दिन्छौँ ।’ उनले भने, ‘तर, माधव नेपालको हकमा आत्मालोचना, गल्ती, कमीकमजोरी सुधार्ने कुनै ठाउँ छैन ।’

देशको विकास गरेर, राष्ट्रलाई एकजुट बनाएर, संविधान कार्यान्वयन गराएर, सर्वस्वीकार्य बनाएर, विकास अगाडि बढाएर अन्तर्राष्ट्रिय स्तरमा नेपालको छवि अगाडि बढाएर अघि बढ्दा विरोधीहरुले आफुलाई अटाएको उनले बताए । ओलीले सर्वोच्च अदालतले जनताको अधिकार खोसेको र अदालतले नै प्रधानमन्त्री छानेर जात्रा देखाएको तर्क गरे ।

‘पार्टी, नेता र सरकारको कामको, नीतिहरुको विचारको मूल्यांकन गर्न पाउने जनताको अधिकार खोसेर अदालतबाट प्रधानमन्त्री तोक्ने विश्वमा कहीँ नभएको जात्रा भयो ।’ उनले थपे, ‘म चुनाव हारेर प्रधानमन्त्रीबाट हटेको होइन, जालझेलबाट हटाइएको हो ।’ ओलीले अदालतमा निवेदन हालेर सधैं सरकार नपाइने समेत बताए ।

बालुवाटारबाट प्रहरीको स्कर्टिङसहित निस्कनुभएका ओलीलाई युवा संघले जुलुस सहित बालकोट पुराएको थियो । बालकोट पुग्दा ओलीको स्वागत गर्दै कार्यकर्ताहरुले प्रधान न्यायाधीश चोलेन्द्र शमशेर जबरा, नेकपा एमालेका वरिष्ठ नेता माधवकुमार नेपाल विरुद्ध नारा लगाएका थिए ।बालकोटमा ओलीको स्वागतमा ब्यान्ड बाजा बजाउनुको साथै एमाले कार्यकर्ताहरुले स्वागत गरेका थिए ।