काठमाडौँ– नेपाल राष्ट्र बैंकका उच्च अधिकारीलाई राष्ट्र बैंकसहित अन्य १५ बैंकका बैंकिङ सिष्टम ह्याक गर्ने चेतावनी आएको छ ।
ADVERTISEMENT
बुधबार साँझ राष्ट्र बैंकका प्रवक्ता, सहप्रवक्ता तथा विभिन्न बैंकका उच्च अधिकारीलाई चेतावनीपूर्ण इमेल (पत्र)आएको बताइएको हो ।
ADVERTISEMENT
ह्याकरले बैंकको सिस्टम ह्याक गर्ने धम्कीपुर्ण इमेल बैंकका उच्च अधिकारीहरुलाई पठाएसंगै अहिले बैंकिङ क्षेत्रमा आतंक फैलिएको छ। पत्रमा नेपाल राष्ट्र बैंकसहित १६ वटा बैंकको प्रणाली ह्याक गरेर पैसा चोर्ने धम्की दिइएको छ। प्रारम्भिक अनुसन्धान अनुसार, पत्र रुसको डोमेन प्रयोग गरेर पठाइएको छ ।
बुधबार साँझ इमेल आए तापनि बिहीबार बिहानै सिष्टम ह्याक गरी रकम निकाल्ने म्यासेज आएको राष्ट्र बैंकको बैंक तथा वित्तीय संस्था नियमन विभागका प्रमुख एवं प्रवक्ता देवकुमार ढकालले जानकारी दिए । उनका अनुसार, आफूलाई ह्याकर बताउने समूहले राष्ट्र बैंकसहित १५ वाणिज्य बैंकको सिस्टम ह्याक गरी रकम निकाल्ने म्यासेज भाइबर र म्यासेन्जरमा प्राप्त भएको थियो ।
यस्तै, उनलाई आज बिहान करिब ७ बजे एक अन्र्तराष्ट्रिय कल पनि आएको थियो । जसमा ‘योर सिष्टम ह्याज बिन ह्याक्’ भनेर फोन काटियो ।
‘मलाई भाइबर र म्यासेन्जरमा यस्तो म्यासेज प्राप्त भएको थियो, हामीले हाम्रो (नेपाल राष्ट्र बैंकको) र बैंकहरूको सिस्टम चेक गर्यौँ । हाम्रो सिस्टम सुरक्षित छ, ह्याक भएको छैन, डराउनुपर्ने अवस्था छैन ।’ उनले यो कार्य कानूनीरूपमा दण्डनीय रहेको बताउँदै दोषिलाई कारबाही हुने बताएका छन् ।
तर, यता ह्याकरद्वारा प्राप्त भएको म्यासेजमा भने म्यासेजमा आफूले पठाएको सन्देशलाई हलुका रूपमा नलिन ह्याकरले चेतावनी समेत दिएको छ ।
उनका अनुसार इमेल र कल गर्ने व्यक्तिको विषयमा थप अनुसन्धान भइरहेको छ । तर, कसले त्यस्तो म्यासेज पठाएको भन्ने विषयमा हालसम्म केही खुलेको छैन । कसैले धम्क्याउने प्रयोजनका लागि पनि उक्त इमेल र फोन गरेको हुनसक्ने आशङ्का गरिएको बैंकका अधिकारीहरु बताउँछन् ।
ह्याकरले पठाएको भनिएको म्यासेजमा नेपाल राष्ट्र बैंक, कुमारी बैंक, नेपाल बैंक, नबिल बैंक, राष्ट्रिय वाणिज्य बैंक, माछापुच्छ्रे बैंक, एनएमबि बैंक, एनआइसी एशिया बैंक, बैंक अफ काठमाण्डू, सिटिजन्स बैंक इन्टरनेशनल, सानिमा बैंक, नेपाल एसबीआई, एभरेष्ट, नेपाल इन्भेष्टमेन्ट र हिमालय बैंकको नाम उल्लेख गरी ती बैंकको सिस्टम ह्याक गरेर रकम निकालिने बताइएको छ ।
