मन्त्रीहरुलाई अध्यक्ष नेपालको निर्देशन : बदनामी हुने र विवादमा पर्ने कुनै काम नगर्नू

काठमाडौँ – नेकपा (एकीकृत समाजवादी)का अध्यक्ष माधवकुमार नेपालले बदनामी हुने र विवादमा पर्ने कुनै पनि काम नगर्न आफ्नो पार्टीबाट मन्त्री भएकाहरुलाई निर्देशन दिएका हुन् ।

आइतबार पार्टी कार्यालय तीनकुनेमा पार्टीबाट मन्त्रि बनेकालाई बोलाएर अध्यक्ष नेपालले ठूलो जिम्मेवारी राष्ट्र, पार्टी र जनताले सुम्पेको भन्दै बदनामी हुने र विवादमा पर्ने कुनै पनि काम नगर्न निर्देशन दिएका हुन् । विकृति, विसंगति, भ्रष्टाचार र अनियमितता भन्ने शब्द पार्टीलाई स्वीकार्य नहुने भन्दै यस कुरामा विशेष ख्याल गर्न पनि उनले निर्देशन दिए । उनले पारदर्शी बन्न र आचारसंहिताको पुर्ण पालना गर्न पनि निर्देशन दिए ।

त्यस्तै अध्यक्ष नेपालले पार्टीभित्र एकलौटी गरेकाले एमाले अध्यक्ष केपी ओलीसंग विद्रोह गर्नुपरेको धारण राखे । प्रतिनिधिसभा विघटन गर्दै असंवैधानिक कार्य गरेका ओलीले पदका लागि जे पनि गरेको र आलोचना गर्नेका लागि ढोका बन्द गरेको उनको आरोप छ ।

नेकपा (एकीकृत समाजवादी)बाट चार मन्त्री र एक राज्यमन्त्री शेर बहादुर देउवा नेतृत्वको सरकारमा सहभागी भएका थिए ।