उपसभामुख प्रतिपक्षको हक हो, राप्रपाले सत्तापक्षलाई समर्थन गर्दैन : राजेन्द्र लिङ्देन

काठमाडौँ – राष्ट्रिय जनता पार्टीका अध्यक्ष राजेन्द्र लिङ्दनले प्रतिनिधिसभाको उपसभामुख पद प्रमुख प्रतिपक्षी दलले पाउनुपर्ने बताएका छन् । शुक्रबार उपसभामुख पदको निर्वाचन प्रक्रियाका लागि जारी प्रतिनिधिसभाको बैठकमा बोल्दै लिङ्देनले उपसभामुख प्रतिपक्षको हक रहेको बताए ।

संविधानमा नै सभामुख एउटा दलको भए उपसभामुख अर्को दलको हुने व्यवस्था गरिएको र त्यसको अर्थ सभामुख सत्तापक्षको भए उपसभामुख प्रतिपक्षको हुने बताए । उनले भने, ‘मूल अर्थ के हो भन्दा सभामुख सत्तापक्षको भए उपसभामुख प्रतिपक्षको हुने भनिएको हो । यसलाई कुनै तर्क वा बाहनामा गलत व्याख्या गरियो भने यसले हिजो होस् या आज, संविधान मिच्ने सिलसिला बढेर जान्छ ।’

उपसभामुख नेकपा एमालेले पाउनुपर्ने बताउँदै उनले सत्तापक्षले उदारतापूवर्क प्रतिपक्ष उपसभामुख दिँदा राम्रो हुने उल्लेख गरे । साथै उनले उपसभामुखका राप्रपाले एमालेकी उम्मेदवार विद्या भट्टराईलाई समर्थन गर्ने बताए ।

उनले भने, ‘उपसभामुखका उम्मेदवार दुबै सक्षम, योग्य, क्षमतावान् हुनुहुन्छ । उहाँहरु दुवैलाई विजयको शुभकामना व्यक्त गर्न चाहन्छु । तर, सैद्धान्तिक रुपमा उपसभामुख प्रतिपक्षको हक भएको हुनाले राष्ट्रिय प्रजातन्त्र पार्टीले उपसभामुखमा सत्तापक्षलाई समर्थन गर्न सक्दैन ।’

लामो समयदेखि रिक्त रहेको उपसभामुख चयनका लागि आज निर्वाचन हुँदैछ । सत्तारुढ पाँच दलीय गठबन्धनका तर्फबाट काँग्रेसकी पुष्पा भुसाल उम्मेदवार छिन् भने प्रमुख प्रतिपक्ष दल नेकपा एमालेका तर्फबाट विद्या भट्टराई उपसभामुखको उम्मेदवार बनेकी छन् ।