काठमाडौँ – धितोपत्र बजारमा शेयर कारोबार मापक नेप्से परिसूचक आज उच्च अङ्कले उकालो लागेको छ । शेयर कारोबार हुने साताको पहिलो दिन आइतबार नेप्से परिसूचक ४३.२० अङ्कले उकालो लागेर १ हजार ९ सय ६५.३६ मा पुगेको छ । यस्तै, ठूला कम्पनीको शेयर कारोबार मापन गर्ने सेन्सेटिभ परिसूचक ८दशमलव शून्य ९ अङ्कले उकालो लागेर तीन सय ८७.५२ मा पुगेको छ ।
ADVERTISEMENT
कूल २ सय २८ कम्पनीको ३९ लाख १३ हजार ५ सय ७३ कित्ता शेयर रु १ अर्ब ५४ करोड ८० लाख ३२ हजार ५ सय ६१ मूल्यमा खरिद बिक्री भयो । नेप्सेका अनुसार कारोबार भएका कूल १३ उपसमूह मध्ये आज सामूहिक लगानी कोषबाहेक १२ वटा उपसमूहको शेयर मूल्य उकालो लागेको छ । लघुवित्त, उत्पादन, निर्जीवन बीमा र जीवन बीमा उपसमूहको शेयर मूल्यमा अत्यधिक वृद्धि भएको छ । आइतबारको कारोबारपछि बजार पूँजीकरण रु २८ खर्ब २६ अर्ब ९३ करोड ७८ लाख ५८ हजार ८ सय १० बराबर रहेको छ ।
ADVERTISEMENT
नेप्सेका अनुसार कारोबारका आधारमा नेष्डो समृद्धि लघुवित्त शीर्ष स्थानमा छ । सो कम्पनीको रु १० करोड १४ लाख ९६ हजार ६ सय ८६ बराबरको कारोबार भयो । यस्तै, एभरेष्ट बैंक रु सात करोड ९ लाख १ हजार १ सय ७५, हिमाल दोलखा हाइड्रोपावर रु छ करोड ७५ लाख ४८ हजार १ सय ८६, जाल्पा सामुदायिक लघुवित्त रु ५ करोड ६६ लाख २५ हजार ९ सय १९ र हिमालयन डिस्टिलरी रु ४ करोड ४७ लाख २५ हजार ९ सय ६८ बराबरको कारोबार भई शीर्ष ५ भित्र पर्न सफल भएका छन् ।
नेप्सेका अनुसार आजको कारोबारमा विभिन्न ४ कम्पनीको शेयर मूल्य १० प्रतिशतले वृद्धि भई सकारात्मक सर्किट लागेको छ । सकारात्मक सर्किट लागेका कम्पनीहरूमा मानुषी लघुवित्त, जाल्पा सामुदायिक लघुवित्त, नेष्डो समृद्धि लघुवित्त र उपकार लघुवित्त छन् । त्यस्तै, उन्नति सहकार्य लघुवित्तका लगानीकर्ताले ९.९१ प्रतिशतले कमाएका छन् ।
त्यस्तै, नबिल इक्विटी फण्ड २.४८, आरबीबी म्युचुअल फण्ड पहिलो २.४०, साङ्ग्रिला डेभलपमेन्ट बैंकको ऋणपत्र १.९९, एभरेष्ट बैंक १.९६ र नबिल ब्यालेन्स फण्डका लगानीकर्ताले एक दशमलव ९२ प्रतिशतले गुमाएका छन् ।
