सदनमा बजेटमाथि छलफल जारी, कसले के भने ?

काठमाडौँ– प्रतिनिधि सभा बैठकमा आर्थिक वर्ष २०८०/०८१ को बजेटमाथि छलफल जारी छ । बुधवार ११ बजेदेखि सुरु भएको छलफलमा सांसदहरुले आ–आफ्नो धारणा प्रस्तुत गरेका छन् ।

यस क्रममा सत्तारुढ दलका सांसदहरुले सरकारले ल्याएको आगामी आर्थिक बर्षको बजेट सकारात्मक रहेको जनाएका छन् भने प्रतिपक्षी सांसदहरुले बजेटको कार्यान्वयनका बारेमा प्रश्न उठाएका छन् ।

प्रतिनिधिसभा बैठकमा बुधबार बजेटमाथिको छलफल क्रममा सत्तापक्ष सांसदहरुले बजेटको बचाउ र प्रतिपक्षी सांसदहरुले बजेटको विरोध गरेका हुन् । छलफलमा भाग लिदै कांग्रेस सांसद दिलेन्द्र बडुले बजेटले पुँजीगत खर्च बढाउने र अनुत्पादक खर्चलाई घटाउने प्रयत्न गरेको बताए । उनले आगामी आर्थिक वर्षको बजेट कार्यान्वयनको अनुगमनको प्रभावकारिता बढाउने विषय सकारात्मक रहेको जिकिर गरे । २० वटा सरकारी निकायलाई खारेजी तथा गाँभ्ने सरकारको निर्णय स्वागतयोग्य रहेको उनको धारणा छ ।

त्यस्तै एमाले सांसद रघुवीर महासेठले सार्वजनिक खरिद ऐन बनाउँदा कुनै ठेकेदारलाई लाभ पुग्ने गरी बनाइएको उल्लेख गरे । वीरगञ्ज–काठमाडौँ र रसुवा–काठमाडौँ रेलमार्गको डिपिआर ढिला हुनुमा सरकार जिम्मेवार रहेको भन्दै उनले सुनकोसी मरिण, भेरी बबई र रानी जमरालगायत सिँचाइ आयोजनाको कामलाई प्राथमिकतामा राख्न नसकिएको आरोप लगाए ।

त्यस्तै सांसद लेखनाथ दाहालले बजेटले समस्याको उठान गरेको र पुँजीगत खर्चका लागि कार्ययोजना बनाएर अनुगमन संयन्त्र परिचालन गर्ने विषय सकारात्मक रहेको धारणा सुनाए ।

सांसद उपेन्द्र यादवल भने बजेटमा केही सकारात्मक, केही नकारात्मक र केही विभेदकारी विषय राखिएको राय राखे । बजेट निर्माण गर्दा सन्तुलित र समावेशी विकासको अवधारणालाई अवलम्बन गर्न नसकेको उनले दाबी छ ।

त्यस्तै सांसद डा अमरेशकुमार सिंहले मधेशलाई न्यून प्राथमिकतामा राखेको भन्दै आगामी आर्थिक वर्षका लागि असमानरुपमा बजेट विनियोजन भएको जिकिर गरेका छन् ।