प्रधान सेनापतिसँग अमेरिकी राष्ट्रिय सुरक्षा परिषद्का वरिष्ठ निर्देशकको शिष्टाचार भेट

काठमाडौँ – प्रधान सेनापति प्रभुराम शर्मासँग अमेरिकाका राष्ट्रिय सुरक्षा परिषद्का दक्षिण एशियाका लागि वरिष्ठ निर्देशक एलीन लाउबाचरले भेटवार्ता गरेका छन् । उनीहरुबीच शुक्रबार नेपाली सेनाको मुख्यालय जंगी अड्डामा शिष्टाचार भेटवार्ता भएको हो ।

प्रधान सेनापतिको कार्यकक्षमा भएको उक्त भेटघाटमा दुई पक्षीय आपसी हित तथा पारस्परिक सम्बन्धका विषयमा छलफल भएको नेपाली सेनाले जनाएको छ । भेटघाटमा नेपालका लागि संयुक्त राज्य अमेरिकाका राजदूत डिन आर थम्सनसमेत उपस्थित रहेका थिए ।

भेटघाटले दुई देशबीचको सम्बन्ध थप सुमधुर एवं प्रगाढ बनाउन मद्दत पुग्ने विश्वास व्यक्त गरिएको छ ।