काठमाडौं – प्रधानमन्त्री वालेन्द्र शाह भारतको औपचारिक भ्रमणमा निस्कने भएपछि ऊर्जा, जलस्रोत तथा सिँचाइमन्त्री विराजभक्त श्रेष्ठलाई कार्यवाहक प्रधानमन्त्रीको जिम्मेवारी दिइने भएको छ।
प्रधानमन्त्री शाहसँगै अर्थमन्त्री डा. स्वर्णिम वाग्ले र परराष्ट्रमन्त्री शिशिर खनाल पनि भारत भ्रमणमा जाने भएपछि मन्त्रिपरिषद्को वरियताक्रमअनुसार श्रेष्ठलाई उक्त जिम्मेवारी दिन लागिएको हो।
प्रधानमन्त्री शाहले आफ्नो अनुपस्थितिमा दैनिक प्रशासनिक कार्य सञ्चालन गर्ने जिम्मेवारी श्रेष्ठलाई दिन राष्ट्रपति रामचन्द्र पौडेलसमक्ष सिफारिस गरिसकेको स्रोतले जनाएको छ। सोही सिफारिसका आधारमा राष्ट्रपति पौडेलले श्रेष्ठलाई कार्यवाहक प्रधानमन्त्रीको जिम्मेवारी तोक्नेछन्।
भारतीय प्रधानमन्त्री र राष्ट्रपतिसहित उच्चपदस्थ अधिकारीसँग भेटवार्ता गर्ने कार्यतालिकासहित प्रधानमन्त्री शाह आज नेपाली प्रतिनिधिमण्डलको नेतृत्व गर्दै भारत प्रस्थान गर्दैछन्। उनी भोलि साँझ स्वदेश फर्किने कार्यक्रम रहेको छ।


























