काठमाडौँ– नेपाली कांग्रेसकी सांसद माया राईलाई शनिबार राति काठमाडौंको कपनस्थित निवासबाट प्रहरीले पक्राउ गरेको छ। स्वर्णलक्ष्मी सहकारीको ठगी प्रकरणमा संलग्न रहेको आरोपमा उनीमाथि ठगी र संगठित अपराधसम्बन्धी मुद्दा दर्ता प्रक्रिया अघि बढाइएको छ।
ADVERTISEMENT
प्रहरीका अनुसार राईलाई शनिबार राति पक्राउ गरी काठमाडौं उपत्यका अपराध अनुसन्धान कार्यालय, टेकुमा राखिएको थियो र त्यहींबाट जिल्ला प्रहरी परिसर, भद्रकालीमा बुझाइएको हो। आइतबार बिहानै परिसरले संसद सचिवालयलाई सांसद राई हिरासतमा रहेको जानकारी गराएको छ।
ADVERTISEMENT
जिल्ला प्रहरी परिसर भद्रकालीका प्रवक्ता एसपी अपिलराज बोहोराका अनुसार राईलाई म्याद थपका लागि सरकारी वकिलको कार्यालयमा पेश गरिएको छ। प्रारम्भिक अनुसन्धानमा स्वर्णलक्ष्मी सहकारीमार्फत १ अर्ब १८ करोड रुपैयाँभन्दा बढी रकम हिनामिना गरिएको पुष्टि भएको प्रहरीले जनाएको छ।
राई आर्थिक वर्ष २०७३/७४ देखि २०७५/७६ सम्म स्वर्णलक्ष्मी सहकारीको सञ्चालक समिति सदस्य थिइन्। यसअघि उक्त प्रकरणमा राष्ट्रिय स्वतन्त्र पार्टीका सभापति तथा पूर्वगृहमन्त्री रवि लामिछाने, पूर्वडीआईजी छविलाल बञ्जाडे जोशीसहितका व्यक्तिहरूलाई पनि प्रहरीले पक्राउ गरी मुद्दा अगाडि बढाइसकेको छ। तीमध्ये केही धरौटीमा रिहा भइसकेका छन्।
सांसद राईमाथि जिल्ला अदालतबाट पक्राउ पुर्जी जारी भइसकेको भए पनि उनी अनुसन्धान प्रक्रियामा सहभागी नभएर फरार रहिएकी थिइन्। संसदमा निरन्तर उपस्थिति जनाइरहेकी सांसद राईमाथि कारवाही नहुनुका कारण संसदभित्रै आलोचना भएको थियो।
राई पक्राउ परेपछि त्यसको सूचना संघीय संसद सचिवालयमा आइतबार बिहान पुगेको छ, जुन प्रतिनिधिसभाको बैठकमा सभामुखमार्फत औपचारिक रूपमा सुनाइनेछ।
