धनकुटामा हावाहुरीका कारण सरकारी र निजी घरमा पोल ढलेर क्षति

काठमाडौं – सोमबार रातीको हावाहुरीका कारण धनकुटामा सरकारी निकायका साथै निजी घरमा क्षति पुगेको छ ।

हावाहुरीका कारण लोकसेवा आयोग, आयुर्वेद कार्यालय, संग्राहलय लगाएतका कार्यालयहरुमा क्षति पुगेको धनकुटाका प्रमुख जिल्ला अधिकारी बिनोद कुमार खड्काले जानकारी दिए । हावाहुरीका कारण सदरमुकामका केही घरमा क्षती पुगेको उहाले बताए ।

धनकुटा नगरपालिकाको मदन चोक , विहीबारे हटिया, माथिल्लो कोप्चे, बालमन्दीर, भिमनारायण चोक, विचबजारमा रहेका घरमा क्षति पुगेको छ । त्यस्तै निगाले, कागते, सुकेपोखरी लगायतको स्थानमा समेत क्षती पुगेको छ । हावाहुरीका कारण घरका छाना उडाएको, बिजुलीको पोल लडेका छन् सदरमुकाम बाहिर पनि हावाहुरी आएकाले क्षती भएको हुन सक्ने प्रमुख जिल्ला अधिकारी खड्काले बताए ।

हावाहुरीको क्षति संकलन कार्य भइरहेको उहाले जानकारी दिनुभयो । त्यस्तै रुख ढलेर कोशी राजमार्गको धनकुटा हिले खण्डको अवरुद्ध हटाइएको छ । हावाहुरीका कारण धनकुटा सदरमुकामसहित जिल्लाका विभिन्न क्षेत्रमा विद्युत सेवा अवरुद्ध भएको छ ।

विद्युतका पोल भाँचिनुका साथै रुख ढल्दा तार चुँडिँदा विद्युत आपूर्ति प्रभावित भएको हो । धरान–धनकुटा ३३ केभी तथा वसन्तपुर ३३ केभी लाइनका विभिन्न स्थानमा क्षति पुगेपछि विद्युत सेवा सुचारु गर्न नेपाल विद्युत प्राधिकरण धनकुटा वितरण केन्द्रका प्राविधिक टोलीहरू मर्मत कार्यमा खटिएका छन् ।